छत्रपती संभाजीनगर (मेट्रोपोलिस पोस्ट वृत्तसेवा) : घरजावई बनून राहण्यास नकार देणाऱ्या स्वतःच्या घरी राहण्याचा हट्ट धरणाऱ्या २४ वर्षीय तरुणाला सासरच्यांनी त्याच्या घरी येऊन बेदम मारहाण केली. यात जावई जखमी झाला आहे. ही घटना बुधवारी (१७ डिसेंबर) सकाळी साडेअकराच्या सुमारास घडली.
सुलेमान हसन शहा (वय २४, रा. मिसारवाडी वैशाली धाब्याजवळ छत्रपती संभाजीनगर) असे जखमी तरुणाचे नाव आहे. तो आई, वडील व भावासोबत राहतो. मिस्तरी काम करून कुटुंबाला हातभार लावतो. त्याचे लग्न दोन वर्षांपूर्वी झाले असून, पत्नी मुस्कान लग्न झाल्यापासून माहेरी गुजरातमध्ये राहते. लग्नानंतर एक महिना सुलेमान सासरवाडीत राहिला. पण त्याचे साले त्याला मारहाण करत असल्याने तो छत्रपती संभाजीनगरला निघून आला. त्यानंतर सासू, सासरे त्याला तेथे राहण्यासाठी बोलावत होते. पण सुलेमान जाण्यास टाळाटाळ करत होता.
बुधवारी सकाळी साडेअकराला सुलेमान आई, वडिलांसह घरी असताना सासरा याकूब हाजी ईस्माइल शहा दिवान, सासू फिरदोस याकूब शहा दिवान, साला आयान याकूब शहा दिवान, साडू वसीम जोहर शहा दिवान (सर्व रा. गुजरात) हे आले. त्यांनी घरात घुसून सुलेमानला जाब विचारला. तुला राहण्यासाठी बोलावले होते. तू आमच्याकडे का आला नाही, असे म्हणून त्यांनी सुलेमानला व त्याच्या आई-वडिलांना शिवीगाळ करून हाताचापटाने मारहाण केली. घरातील सामानांची तोडफोड करून नुकसान केले. तू माझ्या मुलीची जिंदगी बरबाद केली, तुला पाहून घेऊ, अशी धमकी देऊन निघून गेले. सुलेमानच्या तक्रारीवरून सिडको पोलिसांनी त्याच्या सासू, सासरा, साला, साडूविरुद्ध गुन्हा दाखल केला आहे. अधिक तपास पोलीस अंमलदार कृष्णा बोऱ्हाडे करत आहेत.
.jpg)
.jpg)
