Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : भानुदासनगरमध्ये कुख्यात गुन्हेगाराने भररस्त्यात धारदार कोयता घेऊन धिंगाणा घातला. रविवारी (१६ नोव्हेंबर) सायंकाळी साडेपाचला ही घटना घडली. जवाहरनगर पोलिसांनी माहिती मिळताच घटनास्थळी येऊन घेऊन त्याची पोलीस ठाण्यात वरात नेली.
आनंद पद्माकर खिल्लारे (वय २८, रा. उत्तमनगर, जवाहर कॉलनी) असे या अट्टल गुन्हेगाराचे नाव आहे. तो रेकॉर्डवरील गुन्हेगार असून, त्याच्याविरुद्ध तीन ते चार गंभीर गुन्हे दाखल आहेत. रविवारी सायंकाळी मोठा धारदार लोखंडी कोयता घेऊन आनंद खिल्लारे रस्त्यावर आला. शिवीगाळ, आरडाओरड करत, नागरिकांना धमकावत तो रस्त्यावर धिंगाणा घालत होता. यामुळे नागरिकांत त्याची दहशत पसरली. ही बाब जवाहरनगर पोलिसांना कळताच सहायक पोलीस उपनिरीक्षक गोकुळ लोधवाल यांनी सहकाऱ्यांसह भानुदासनगरमध्ये धाव घेतली. पोलीस जवळ येऊन थांबले तरी आनंदची मस्ती सुरूच होती. पोलिसांनी त्यावर झडप घालून मानगूट पकडली आणि चोप देतच पोलीस ठाण्याकडे वरात काढली... वेळीच येऊन आनंदची दहशत संपवल्याने नागरिकांनी पोलिसांचे आभार मानले. त्याची भानुदासनगरातून धिंड काढण्याची अपेक्षा व्यक्त होत आहे. जेणेकरून तो पुन्हा अशाप्रकारे लोकांना धमकावणार नाही.
