छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसीतील बजाजनगरमध्ये आज, ४ जानेवारीला सकाळी एकच खळबळ उडाली. बजाजनगर–वडगाव (कोल्हाटी) रोडवरील एका खासगी शाळेसमोर भररस्त्यात पूजा केलेले मडके, रांगोळी, अगरबत्ती, लिंबू, मीठ व कुंकू ठेवून जादूटोणा करण्यात आल्याचे दिसले. मटक्यावर लिहिले होते, ओलांडून गेला तर मृत्यू होईल, मागे वळून पाहिल्यास जीव जाईल... ते सारं पाहून नागरिक घाबरून गेले.
विशेष म्हणजे, काही काळ परिसरात ये-जा थांबली होती. शाळेसमोरच असा प्रकार करण्यात आल्याने विद्यार्थी, पालक व स्थानिक नागरिकांत घबराट पसरली होती. नागरिकांनी पोलिसांना कळवले. पोलिसांच्या उपस्थितीत विज्ञाननिष्ठ मंडळींनी हा जादूटोणा हटवला. खासगी शाळेचे व्यवस्थापक नामदेव बनकर यांनी वाळूज एमआयडीसी पोलीस ठाण्यात तक्रार दाखल केली आहे. हा प्रकार कोणाला तरी लक्ष्य करून, भीती निर्माण करण्यासाठी केल्याचा संशय निर्माण करणारा असल्याने पोलीस तपास करत आहेत. 
परिसरातील सीसीटीव्ही फूटेज तपासून खोडकराचा शोध पोलीस घेणार आहेत. सामाजिक कार्यकर्ते हनुमान भोंडवे, रोहित खैरे, अशोक लगड, पंडित नवले, किशोर उमाळे, विशाल खंडागळे यांनी नागरिकांना आवाहन केले आहे की, अशा प्रकाराला खतपाणी न घालता असे प्रकार करताना कोणी आढळल्यास पोलिसांना कळवा. अशा अंधश्रद्धा पसरवणाऱ्यांविरोधात कठोर कारवाई व्हावी, अशी मागणीही नागरिकांनी केली आहे.
.jpg)
