छत्रपती संभाजीनगर (सीएससीएन वृत्तसेवा) : भावसिंगपुरा पेठेनगरातील निसर्ग चौकातून १७ वर्षे ११ महिने वयाच्या मुलीचे रविवारी (३१ ऑगस्ट) दुपारी अपहरण झाल्याची घटना समोर आली आहे. मुलगी किचनमध्ये स्वयंपाक करत होती, तर आई घरातच नातेवाइकांसोबत गप्पा मारत होती. आईने थोड्या वेळाने किचनमध्ये जाऊन पाहिले तर मुलगी गायब झालेली होती. सिटी चौक पोलिसांनी अपहरणाचा गुन्हा दाखल करून मुलीचा शोध सुरू केला आहे.
४१ वर्षीय महिलेने या प्रकरणात तक्रार दिली आहे. त्‍या किरायाने राहतात. त्‍यांची ३ नंबरची मुलगी २०२४ मध्ये १२ वी पास झाली होती. त्यानंतर ती घरीच होती. ती दोन-तीन दिवसांपासून आईला म्हणत होती, की मला पळून जाऊन लग्न करायचे आहे, मला पुण्याला जायचे आहे... मात्र तिच्या आईने तिच्या बोलण्याला गांभीर्याने घेतले नाही. हे कुटुंब भावसिंगपुऱ्यातून टाऊन हॉल येथे राहायला जाणार असल्याने सामान शिफ्ट करण्यात तिची आई व्यस्त होती.
रविवारी दुपारी अडीचला सर्व घरी असताना मुलगी स्वयंपाक करत होती. घरी काही नातवाइक आलेले असल्याने तिची आई त्यांच्याशी गप्पा मारत होती. तीच संधी साधून मुलगी घरातून गायब झाली. काही वेळाने तिची आई किचनमध्ये आल्यावर ही बाब समोर आली. तिच्या आईने परिसरात शोध घेतला. नातेवाइकांकडे चौकशी केली. मात्र ती मिळून आली नाही. तिला कोणीतरी फूस लावून पळवल्याचे तक्रारीत तिच्या आईने म्हटले आहे. तिने सोबत कोणतीही मौल्यवान वस्तू नेली नाही. अधिक तपास पोलीस उपनिरीक्षक अजित दगडखैर करत आहेत.
.jpg)
.jpg)
.jpg)
