छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : भरधाव गॅस टँकर आणि हायवा यांच्यात पुढे जाण्याची जणू स्पर्धा लागली. दोन्ही वाहनांनी दुचाकीला हूल देत धडक दिली. टँकरच्या मागच्या चाकाखाली दुचाकी आली. यात दुचाकीवरील पत्नीचा चाकाखाली येऊन जागीच मृत्यू झाला, तर पती गंभीर जखमी झाला. ही दुर्दैवी घटना शनिवारी (२५ ऑक्टोबर) दुपारी चार वाजता छत्रपती संभाजीनगर शहराजवळील केंब्रिज चौकात घडला.
सौ. संगिता विलास शेजूळ (वय ४८, रा. अंजनडोह, ता. जि. छत्रपती संभाजीनगर) असे मृत्यू झालेल्या महिलेचे नाव असून, त्यांचे पती विलास पोपट शेजूळ (वय ५५) गंभीर जखमी आहेत. शेजूळ दाम्पत्य गावातच शेती करायचे. त्यांची दोन्ही मुले छत्रपती संभाजीनगरमध्ये शिक्षण घेतात. संगिता यांचा मावसभाऊ चितेगाव परिसरातील एका कंपनीत नोकरीला आहे. माहेरी जाणे शक्य नसल्याने त्या भावाकडे भाऊबीजेला पतीसह गेल्या. आनंदात भाऊबीज केल्यानंतर शनिवारी दुपारी तीनला दोघे घराकडे निघाले होते. झाल्टा फाट्याकडून केंब्रीज चौकात आले. केंब्रिज चौकातून सावंगी बायपासने जात असताना समोर हायवा सुसाट निघाला होता, तर मागून येणाऱ्या भरधाव गॅस टँकरला पुढे जायचे होते.
त्यामुळे विलास यांनी दुचाकी रस्त्याच्या बाजूला घेण्याचा प्रयत्न केला असता टँकर व हायवाने पुढे जाण्याच्या नादात हूल देत धडक दिली. त्यामुळे दुचाकी टँकरच्या मागच्या चाकाखाली आली. संगिता यांचा चाकाखाली येऊन जागीच मृत्यू झाला. विलास बाजूला फेकले गेले. त्यांना नागरिकांनी चिकलठाण्याच्या मिनी घाटी रुग्णालयात दाखल केले. अपघाताची माहिती कळताच सिडको वाहतूक शाखेचे सहायक पोलीस निरीक्षक हरेश्वर घुगे, सिडको एमआयडीसी पोलीस ठाण्याचे पोलीस उपनिरीक्षक विष्णू मुंढे यांनी घटनास्थळी धाव घेतली. दोन्ही चालकांना ताब्यात घेतले. विलास यांचे भाऊ दौलत शेजूळ यांच्या तक्रारीवरून दोन्ही चालकांविरुद्ध सिडको एमआयडीसी पोलिसांनी गुन्हा दाखल केला आहे.
सावंगी बायपासवर वाहने धावतात सुसाट...सावंगी बायपासवरून अवजड वाहने सुसाट धावतात. यामुळे दुचाकीस्वारांना अक्षरशः जीव मुठीत घेऊन प्रवास करावा लागतो. या रस्त्यावर वाहतूक पोलिसांनी गस्त कायम ठेवावी. वेग मापक यंत्र बसवावे, अशी मागणी नागरिकांकडून होत आहे. हा बायपास शहराजवळून जात असल्याने अनेक वस्त्या, गावांतील नागरिकांची वर्दळ शहरात जाण्यासाठी असते. ठिकठिकाणी बायपास ओलांडण्यासाठी चौक आहेत. मात्र ते लक्षात येत नाहीत. त्यामुळे तिथूनही अवजड वाहने सुसाट धावत असतात. त्यामुळे रस्ता ओलांडतानाही जीव मुठीत घेऊनच ओलांडावा लागतो. याकडे वाहतूक विभागाने लक्ष द्यावे, अशी मागणी होत आहे.
.jpg)
.jpg)
