फोटो हाती देत पोलीस म्हणाले, अपघातात मृत्यू झालेले हे तुमचेच पती का?, पत्नीने फोटो पाहिला अन्‌ हंबरडा फोडला!; पुंडलिकनगर पोलीस ठाण्यात काय घडलं...

छत्रपती संभाजीनगर (मेट्रोपोलिस पोस्ट वृत्तसेवा) : २९ नोव्‍हेंबरला कामानिमित्त घराबाहेर पडलेले ३५ वर्षीय सखाराम विठ्ठलराव चांदणे (रा. नुरी मशिदीजवळ, इंदिरानगर) नंतर घरी परतलेच नाहीत. बराच शोध घेतल्यानंतर त्यांच्या पत्नीने जवाहरनगर पोलीस ठाण्यात हरवल्याची नोंद केली... बुधवारी (२४ डिसेंबर) पोलिसांनी अचानक कॉल करून त्यांना पुंडलिकनगर पोलीस ठाण्यात जायला सांगितले. तिथे गेल्यानंतर पोलिसांनी एक फोटो हाती दिला आणि सांगितलं, अपघाती मृत्यू झालाय, हे तुमचेच पती का?, तो फोटो पाहून पत्नीने एकच हंबरडा फोडला...

सखाराम चांदणे हे पत्नी, आई, मुलांसह राहत होते. रंगकाम करून कुटुंबाचा उदरनिर्वाह करायचे. ते २९ नोव्हेंबरला बेपत्ता झाल्यानंतर त्यांच्याकडे मोबाइलही नसल्याने संपर्क होत नव्हता. आपला मुलगा परत येईल, या आशेवर त्यांची आई कुसुम (वय ६०) वाट पाहत होत्या. अखेर कुटुंबीयांनी २२ डिसेंबरला जवाहरनगर ठाण्यात सखाराम चांदणे हरवल्याची तक्रार दिली. जवाहरनगर पोलिसांनी आसपासच्या सर्व पोलीस ठाण्यांत सखाराम यांचे छायाचित्र पाठवले. एका अपघातात मृत्यू झालेल्या व्यक्तीचे छायाचित्र सखाराम यांच्याशी जुळत असल्याचे पुंडलिकनगर पोलिसांच्या लक्षात आले. त्यांनी जवाहरनगर पोलिसांना कळवले.

जवाहरनगर पोलिसांनी लगेचच सखाराम यांच्या कुटुंबीयांना कळवले. आई कुसुम, पत्नी उषा या कुटुंबासह लगेचच पुंडलिकनगर पोलीस ठाण्यात धावल्या. पोलिसांनी त्यांना अनोळखी मृतदेहाचे छायाचित्र दाखवले. सखाराम यांच्या पत्नीने छायाचित्र पाहताच अनोळखी म्हणून नोंद केलेला मृतदेह आपल्या पतीचाच असल्याचे सांगत हंबरडा फोडला.
नक्की काय घडलं?
२९ नोव्हेंबरला सकाळी ९:३० वाजता अज्ञात वाहनाच्या धडकेने सखाराम गंभीर जखमी झाले होते. २ डिसेंबरला सायंकाळी ४ वाजता त्यांचा घाटी रुग्णालयात उपचारादरम्यान मृत्यू झाला. मात्र त्यांची ओळखच पटत नव्हती. पोलिसांनी शोध घेऊन अखेर २२ डिसेंबरला पंचशील महिला बचत गटाच्या मदतीने मृतदेहावर अंत्यसंस्कार केले. घरापासून अवघ्या तीन किलोमीटर अंतरावर सखाराम यांचा अपघाती मृत्यू होऊनही ओळख न पटू शकल्याने कुटुंबीयांना अंत्‍यविधीचे सोपस्कारही पार पाडता आले नाहीत.