आधी मुलींचे फोटो काढले, नंतर टवाळखोरांनी संसारनगरमध्ये घुसवला ४० जणांचा जमाव, मुलीच्या कुटुंबीयांसह रहिवाशांना बेदम मारहाण, बलात्कार करून कापून फेकण्याची धमकी!!

छत्रपती संभाजीनगर (मेट्रोपोलिस पोस्ट वृत्तसेवा) : टवाळखोरांनी मुलींचे फोटो काढले. याबद्दल जाब विचारणाऱ्या अल्पवयीन मुलालाही मारहाण सुरू केली. मुलाचे कुटुंब त्याला वाचविण्यासाठी धावले असता त्यांनाही मारहाण केली. नंतर टवाळखोरांनी त्यांचे साथीदारही बोलावले. समतानगरमधून संसारनगरमध्ये ३५ ते ४० जणांचा जमाव लाठ्या काठ्या, प्लास्टिक पाइप घेऊन दाखल झाला. दिसेल त्याला मारहाण सुरू केली. दोन्ही गटांतील ५० ते ६० जणांमध्ये तुंबळ हाणामारी होत असताना क्रांती चौक पोलिसांनी तातडीने घटनास्‍थळी धाव घेऊन परिस्थिती नियंत्रणात आणली. ही घटना रविवारी (७ डिसेंबर) मध्यरात्री १२ च्या सुमारास क्रांती चौकाजवळील संसारनगरमध्ये घडली.

४४ वर्षीय तक्रारदार संसारनगरमध्ये राहतात. ते चालक आहेत. ६ डिसेंबरला रात्री ९ च्या सुमारास त्यांच्या तीन मुली घरासमोर शेकोटी करून बसल्या. समतानगरमधील टवाळखोर तिथून जात होते. त्यांनी मोबाइलमध्ये मुलींची छायाचित्रे काढली. ही बाब मुलींच्या अल्पवयीन भावाने पाहिली. रात्री साडेअकराला पुन्हा तेच टवाळखोर तिथून जात असताना अल्पवयीन मुलाने माझ्या बहिणींची छायाचित्रे का काढली, अशी विचारणा केली. त्यामुळे संतापलेल्या पाच ते सहा टवाळखोरांनी मुलाला बेदम मारहाण सुरू केली. आरडाओरड ऐकून मुलाचे कुटुंबीय भांडण सोडवायला धावले.

त्यावेळी टवाळखोरांनी त्यांच्या अन्य साथीदारांना बोलावून घेतले. त्यानंतर समतानगरमधून ३५ ते ४० जणांचा जमाव संसारनगरमध्ये दाखल झाला. लाठ्या काठ्या, प्लास्टिक पाइपने त्यांनी दिसेल त्याला मारहाण करायला सुरुवात केली. एकीकडे टवाळखोर आणि त्यांचे साथीदार तर दुसऱ्या बाजूला अल्पवयीन मुलाचे कुटुंबीय आणि स्थानिक रहिवाशी होते. दोन्ही गटांत तुंबळ हाणामारी सुरू झाली. मुलींवर बलात्कार करून कापून फेकण्याची धमकी टवाळखोरांनी देत अश्लाघ्य शिवीगाळ केली. हाणामारीची माहिती कळताच क्रांती चौक पोलिसांनी संसारनगरमध्ये धाव घेतली.

त्यानंतर टवाळखोरांची पळापळ सुरू झाली.  हल्लेखोरांमध्ये अल्फाज कुरेशी, निजाम कुरेशी, अमन कुरेशी, मुजमील कुरेशी, शेहबाज कुरेशी यांच्यासह ३५ ते ४० जण असल्याचे तक्रारीत म्हटले असून, त्यांच्याविरुद्ध क्रांती चौक पोलिसांनी गुन्हा दाखल केला आहे. हाणामारीत अनेक जण जखमी झाले आहेत. या घटनेला राजकीय रंग देण्याचाही प्रयत्न झाला. दोन्ही वेगवेगळ्या पक्षांतील राजकीय मंडळी क्रांती चौक पोलीस ठाण्यात आली होती. अधिक तपास सहायक पोलीस आयुक्‍त सागर देशमुख करत आहेत.