छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरमध्ये सायबर भामट्यांनी तब्बल सहा दिवस गृहिणीला डिजिटल अरेस्टमध्ये ठेवत २५ लाख ८७ हजार रुपये उकळल्याची धक्कादायक घटना समोर आल्याने खळबळ उडाली आहे. मनी लाँड्रिंगच्या गुन्ह्यातील आरोपींच्या जबाबात तुमचे नाव समोर आले आहे. तुम्हाला अटक करणार असून, तुमच्या घरावर ईडीचा छापा पडणार आहे. घरावर गोळीबार करण्यात येईल... अशा धमक्या भामट्यांनी दिल्या होत्या. पत्नीच्या वागण्यातील बदल पाहून पतीने विश्वासात घेत विचारणा केली. त्यानंतर हा प्रकार समोर आला. दाम्पत्याने बुधवारी (२५ डिसेंबर) पुंडलिकनगर पोलीस ठाण्यात येऊन तक्रार दिली. त्यावरून पोलिसांनी सायबर भामट्यांविरुद्ध गुन्हा दाखल केला आहे.
गारखेडा भागात राहणाऱ्या ५३ वर्षीय गृहिणीचे पती व्यावसायिक सल्लागार आहेत. १६ डिसेंबरला त्या घरी असताना दुपारी ३ ला कॉल आला. तुमच्या मोबाइलची सेवा समाप्त होणार असल्याचे सांगितले. पाठोपाठ आणखी एक कॉल आला. त्याने तुमचा मोबाइल क्रमांक अवैध जाहिरातीच्या प्रकरणात निष्पन्न झाल्याचे सांगितले. लगेचच त्यांना व्हिडीओ कॉल करण्यात आला. व्हिडीओ कॉलवरील व्यक्तीने स्वतःला पोलीस अधिकारी असल्याचे भासवले. त्याच्यामागे मुंबई क्राइम ब्रँचच्या नावाचा डीपी व मागे विश्वास बसेल अशी छायाचित्र असल्याने महिला गांगरून गेली. मनी लाँड्रिंगच्या गुन्ह्यातील आरोपीने जबाबात तुमचे नाव घेतले आहे. व्हॉट्स ॲपवर अरेस्ट वॉरंट, ईडीच्या बनावट नोटिसाही पाठवल्या. ज्यांनी महिलेचे नाव घेतले, त्या आरोपींची छायाचित्रेही पाठवली. महिलेला दिवसभर व्हिडीओ कॉलवर ठेवले जायचे.
बिचारी महिला चार्जिंगला लावून व्हिडीओ कॉल सुरू ठेवत होती आणि स्वतःला निरपराध असल्याचे भामट्यांना सांगत होती. ही बाब तिने कुणाला सांगू नये म्हणून भामट्यांनी एका कागदावर लिहायला सांगून ते मोठ्याने वाचायलाही लावले. दोन दिवस १२-१२ तास डिजिटल अरेस्टमध्ये ठेवले. यादरम्यान भामट्यांनी त्यांच्या सर्व बँक खात्यांची माहिती घेत पैसे पाठवायला सांगितले. महिलेने आधी ४६ हजार रुपये, १८ डिसेंबरला एफडी मोडून ६.५ लाख रुपये पाठवले. २२ डिसेंबरपर्यंत सातत्याने धमकावून २५ लाख ८७ हजार रुपये भामट्यांनी उकळले. यादरम्यान त्यांनी ईडीची छापा पडेल, घरावर गोळीबार करू, अशी धमकी दिली.
ब्लॅकमेलिंगदरम्यान तुमच्यावर पाळत ठेवून असल्याचेही सांगत असल्याने महिला प्रचंड घाबरलेली असायची. महिलेच्या पतीला पत्नीच्या वागण्यातील बदल जाणवत होता. ते वारंवार विचारतही होते. मात्र महिला इतकी घारबलेली होती, की गोळीबाराच्या भीतीने काहीच सांगत नव्हती. अखेर २३ डिसेंबरला त्यांच्या पतीने त्यांना विश्वासात घेऊन विचारणा केली. तेव्हा त्यांनी संपूर्ण प्रकाराचा उलगडा केला. त्यानंतर पतीने त्यांना समजावून सांगितले, की डिजिटल अरेस्ट असा काही प्रकार नसतो. भामटे सध्या अशाप्रकारे अनेकांना लुटत आहेत. त्यानंतर धीर आलेल्या महिलेला घेऊन पतीने पुंडलिकनगर पोलीस ठाणे गाठले. अधिक तपास पोलीस निरीक्षक अशोक भंडारे करत आहेत.
.jpg)
.jpg)
