छत्रपती संभाजीनगरच्या इंजिनिअर तरुणीला थायलंडमध्ये विकले! 

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगरच्या इंजिनिअर तरुणीला थायलंडला नोकरीच्या आमिषाने नेत विकण्यात आले. कंपनी मालकानेच हे कृत्य केले. तरुणी भारतीय दूतावासाच्या मदतीने स्वतःची सुटका करून घेत मायदेशी परतली आहे. या प्रकरणात पुंडलिकनगर पोलिसांनी तिचा कंपनी मालक अविनाश रामभाऊ उढाण याच्याविरुद्ध सोमवारी (२७ ऑक्‍टोबर) गुन्हा दाखल केला आहे.

२९ वर्षीय तरुणी इलेक्ट्रिकल इंजिनिअर आहे. २०२० मध्ये तिचा घटस्फोट झालेला आहे. २०२१ मध्ये ती छत्रपती संभाजीनगर शहरात नोकरीसाठी आली होती. लेडीज होस्टेलमध्ये राहत होती. २०२५ मध्ये उल्कानगरीच्या शंकरा रेसिडेन्सीतील एफ व्होल्ट कंपनीत तिला नोकरी लागली. काम करताना कंपनीमालक अविनाश उढाणने तिला थायलंड येथे मार्केटिंग मॅनेजरची चांगल्या पगाराची नोकरी असल्याचे सांगितले. या जॉबसाठी त्याने तिच्याकडून दीड लाख रुपये घेतले. जॉब कन्फर्म झाल्याचे सांगून गेल्या ऑगस्टच्या पहिल्या आठवड्यात तिला थायलंडला जाण्यासाठी दिल्ली आंतरराष्ट्रीय विमानतळावर नेऊन सोडले. तेथून ती बँकॉकला गेली. तेथे हरप्रित सिंग नावाचा व्यक्ती तिला घ्यायला आला. त्याने तिला कम्पोट (कम्बोडिया) येथील क्रिएटिव्ह माइंडसेट या कंपनीत टॅक्सीने नेऊन सोडले.

या कंपनीत तरुणीकडून स्कॅमिंगचे काम करून घेतले जाऊ लागले. उढाणने आपल्याला याच कामासाठी थायलंडला पाठवल्याचे आणि विकल्याचे तिला कळल्यावर तिच्या पायाखालची जमीनच सरकली. तिने दोन महिन्यांनी क्रिएटिव्ह माइंडसेट या कंपनीला २ हजार अमेरिकन डॉलर भरून स्वतःची सुटका करून घेतली आणि कम्बोडिया येथील भारतीय दूतावासाच्या मदतीने ती २१ ऑक्टोबरला मुंबईत परतली. अविनाश उढाण याने तिला स्कॅमिंगच्या कामाची पूर्वकल्पना न देता थायलंडला पाठवले आणि चक्क कंपनीला विकल्याने तरुणीने आधी मुंबईतील सहारा पोलीस ठाण्यात तक्रार नोंदविली. हा गुन्हा सहारा पोलिसांनी पुंडलिकनगर पोलिसांकडे वर्ग केला. मात्र घटना जवाहरनगर पोलीस ठाण्याच्या हद्दीत घडल्याने तिकडे गुन्हा वर्ग करण्यात येणार आहे.