छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर शहरातील अनेक बिअरमालक-चालक मनमानी करून कायदे धाब्यावर बसवत असल्याचे दिसून येते. पोलीसही याकडे कानाडोळा करतात. त्यामागचे कारण काही वेगळे असावे. पण सिडको एमआयडीसी पोलीस ठाण्याच्या हद्दीत तरी यापुढे अशी मनमानी बिअरचालक-मालकांना करता येणार नाही. सिडको बसस्थानकामागील रोडवर अक्षयदिप प्लाझा टॉवरमधील यश बिअर शॉपीवर सिडको एमआयडीसी पोलिसांनी छापा मारला. तेव्हा जे समोर आले, ते धक्कादायक होते. पोलिसांनी मालक आशिष प्रेमलाल जैस्वाल (वय ४०, रा. अंभई, ता. सिल्लोड) आणि चालक विजय प्रभाकर राठोड (वय ३३) या दोघांविरुद्ध गुन्हा दाखल केला आहे.
शुक्रवारी (२४ ऑक्टोबर) सायंकाळी सातच्या सुमारास पोलीस निरीक्षक गिता बागवडे या सहकाऱ्यांसह गस्तीवर होत्या. सिडको बसस्थानकामागील रोडवर अक्षयदिप प्लाझा टॉवरमध्ये यश बिअर शॉपीवर मोठ्या प्रमाणात नागरिकांची गर्दी पोलिसांना दिसून आली. काही जण हातात बिअरच्या बाटल्या घेऊन पित उभे होते. पोलिसांना पाहून त्यातील काही जण पळून गेले. यश बिअर शॉपीच्या आतील बाजूस पोलिसांनी पाहणी केली असता १० जण दारू पिऊन मोठ मोठ्याने बोलत असल्याचे दिसून आले. त्यावेळी बिअर शॉपच्या चालकाला पोलिसांनी बिअर पिण्यासाठी जागा उपलब्ध करून देण्याचे लायसन्स तुमच्याकडे आहे का, अशी विचारणा केली. त्यावर त्याने विजय राठोडने ही जागा आमचे मालक आशिष जैस्वाल याची असल्याचे सांगितले.
त्यांनी बिअर व मद्य नागरिकांना पिऊ देण्यासाठी जागा बनवून दिली असून, या ठिकाणी नागरिकांना बिअर पिण्यासाठी बसू देण्यास सांगितले आहे, असे पोलिसांना सांगितले. बिअर शॉपीच्या चालक आणि मालकाविरुद्ध गुन्हा दाखल करण्यात आला आहे. ही कारवाई पोलीस आयुक्त प्रवीण पवार, पोलीस उपायुक्त प्रशांत स्वामी, सहायक पोलीस आयुक्त मनोज पगारे यांच्या मार्गदर्शनाखाली वरिष्ठ पोलीस निरीक्षक गीता बागवडे, सहायक पोलीस निरीक्षक भरत पाचोळे, पोलीस उपनिरीक्षक विष्णू मुंढे, सहायक फौजदार साबळे, संतोष सोनवणे, संजय नंद, रतन नागलोत, परशुराम सोनुने, संतोष गायकवाड, पोलीस अंमदार कपील म्हस्के, ऋषीकेश सांगळे, प्रकाश सोनवणे, अरविंद पुरी, महिला अंमलदार कांचन लोखंडे, गौरी भंडारी, वर्षा पवार यांनी केली.
.jpg)
.jpg)
