छत्रपती संभाजीनगर (मेट्रोपोलिस पोस्ट वृत्तसेवा) : ५ हजारांची साडी ५९९ रुपयांत देण्याचा दावा करून मोठा गर्दी जमवणाऱ्या आकाशवाणी चौकाजवळील टेंज द फॅशन वर्ल्ड कापड दुकान मालकाला जवाहरनगर पोलिसांनी कारवाईचा दणका दिला आहे. या दुकानाच्या दोन्ही मालकांविरुद्ध गुन्हा दाखल केला आहे.
दुकानमालक कृष्णा रघुनाथ देशमुख (वय ३०, रा. देवळाई, सातारा परिसर), संजय ललवाणी (पूर्ण नाव-पत्ता माहीत नाही) अशी गुन्हा दाखल झालेल्यांची नावे आहेत. त्यांच्याविरुद्ध पोलीस अंमलदार पुंडलिक मानकापे यांनी या प्रकरणात तक्रार दिली आहे. देशमुख आणि ललवाणी यांचे टेंज द फॅशन वर्ल्ड नावाचे दुकान आकाशवाणी चौकाजवळील फ्रिडम टॉवरमध्ये (भानुदासनगर) आहे. त्यांनी सोशल मीडियावर आमच्या दुकानात कमी दरात कपडे देत आहोत व कपडे खरेदीत भरपूर सूट देत आहोत, अशी जाहिरातबाजी केली आणि रविवारी (४ जानेवारी) सकाळी ११ ते दुपारी २ पर्यंत मोठी गर्दी जमा केली.
त्यांच्या लहान व अपुऱ्या जागेत कापड दुकानात गर्दी होऊन आपात्कालीन परिस्थिती निर्माण होऊ शकते, याची माहिती असतानाही मालकाने दुकानाजवळ रुग्णवाहिका, फिरते शौचालय, पिण्याच्या पाण्याची व्यवस्था, आपात्कालीन मार्ग व्यवस्था तसेच इतर अत्यावश्यक सेवा उपलब्ध ठेवलेल्या नव्हत्या. दुकानमालकाच्या हयगयीपणाच्या वर्तनामुळे जमलेल्या गर्दी, गोंधळामुळे लोकांच्या जिवीताचा धोका निर्माण झाला. सध्या शहरात महापालिका निवडणूक असल्याने शासनाने जमावबंदी आदेश लागू केलेले आहेत. त्याचेही पालन दुकानमालकाने केले नाही, असे पोलिसांनी तक्रारीत म्हटले आहे. अधिक तपास पोलीस अंमलदार श्री. मेहर करत आहेत.
.jpg)
.jpg)
