छत्रपती संभाजीनगर (सीएससीएन वृत्तसेवा) : वाळूज एमआयडीसीतील कमळापूर रोड भागात राहणाऱ्या १६ वर्षीय मुलीचे अपहरण झाल्याची घटना २६ ऑगस्टला घडली. या प्रकरणात वाळूज एमआयडीसी पोलिसांनी २७ ऑगस्टला गुन्हा दाखल केला. मात्र अद्याप मुलीचा शोध लागलेला नाही. त्‍यामुळे मुलीचे आई-वडील हवालदील झाले आहेत.
४० वर्षीय महिलेने या प्रकरणात तक्रार दिली आहे. त्‍या व त्‍यांचे पती खासगी कंपनीत नोकरी करतात. २६ ऑगस्टला सकाळी सव्वा आठला पती-पत्‍नी नेहमीप्रमाणे कंपनीत कामाला गेले. दुपारी १ ला महिलेने घरी कॉल केला असता लहान्या मुलीने सांगितले, की ताई घरी नाही. पती-पत्‍नी सायंकाळी सातला कंपनीतून घरी आले तरी मोठी मुलगी घरी नव्हती. त्‍यामुळे महिलेने पतीसह मिळून मुलीचा शोध सुरू केला. आजूबाजूच्या परिसरात, तिच्या मैत्रीणींकडे विचारपूस केली. मात्र ती मिळून आली नाही. तिला कुणीतरी फूस लावून पळवल्याचे लक्षात आल्यावर महिलेने वाळूज एमआयडीसी पोलीस ठाण्यात धाव घेऊन तक्रार दिली. त्‍यावरून पोलिसांनी अज्ञात अपहरणकर्त्याविरुद्ध गुन्हा दाखल केला आहे. मुलगी ११ वीत शिकत होती. अधिक तपास पोलीस उपनिरीक्षक विनोद आबूज करत आहेत.
.jpg)
.jpg)
.jpg)
