भिक मागणारी १५ वर्षीय मुलगी गायब!, सिटी चौक पोलिसांकडून शोध सुरू

By City News Desk

On 26 Aug 2025

भिक मागणारी १५ वर्षीय मुलगी गायब!, सिटी चौक पोलिसांकडून शोध सुरू

छत्रपती संभाजीनगर (सीएससीएन वृत्तसेवा) : भिक्षा मागणारी १५ वर्षीय मुलगी गायब झाल्याने सिटी चौक पोलिसांनी अपहरणाचा गुन्हा दाखल करून तिचा शोध सुरू केला आहे. ही घटना शुक्रवारी (२२ ऑगस्ट) रात्री साडेअकराला समोर आल्यानंतर शनिवारी मुलीच्या पित्‍याने पोलिसांत धाव घेतली.

मूळचे मध्यप्रदेशातील खंडवा जिल्ह्यातील छनेरा हर्सूल येथील कुटुंब त्‍यांच्या १ मुलगा, २ मुलींसह छत्रपती संभाजीनगरात उदरनिर्वाहासाठी आले आहे. ते सध्या नेहरू भवनजवळ राहत आहे. मुलीचे आई-वडील बांधकाम साईटवर मजुरी करतात. मुलगा व दोन्ही मुली बुढीलाईन भागात दिवसा भिक्षा मागत फिरत असतात. शुक्रवारी रात्री ९ ला जेवण करून हे कुटुंब झोपी गेले. लहान मुलीने लघुशंकेसाठी आई-वडिलांना झोपेतून साडेअकराला उठवले असता मोठी मुलगी घरात दिसली नाही. मुलीच्या आईने सोबत राहणाऱ्या तिच्या बहिणी व कुटूंबातील अन्य सदस्यांना झोपेतून उठवून चौकशी केली. मुलगी त्यांच्याकडेही दिसून आली नाही. बांधकाम साईटच्या जवळपासही मुलगी दिसली नाही. रात्रभर शोध घेतल्यानंतर अखेर सिटी चौक पोलीस ठाणे गाठून मुलीच्या वडिलांनी तक्रार दिली. फूस लावून मुलीला पळवून नेल्याचे तक्रारीत म्‍हटले आहे. अधिक तपास पोलीस उपनिरीक्षक संजय राठोड करत आहेत.