चिकलठाण्यात भीषण अपघात : दुचाकीने निघालेल्या चौघांना उडवून काळी कार पसार!; २२ वर्षीय तरुणाचा मृत्‍यू, तिघे गंभीर जखमी

छत्रपती संभाजीनगर (सीएससीएन वृत्तसेवा) : एकाच दुचाकीवरून निघालेल्या चौघांना सुसाट कारने धडक दिली. दुचाकी चालवणाऱ्या २२ वर्षीय तरुणाचा मृत्‍यू, तर त्‍याचे ३ मित्र गंभीर जखमी झाले आहेत. ही घटना केंब्रिज ते चिकलठाणा रस्‍त्‍यावरील हिनानगरात सोमवारी (२५ ऑगस्‍ट) पहाटे अडीचला घडली.

प्रणव सचिन उपाध्ये (वय २२, रा. बेंबळी, ता. जि. धाराशिव, ह.मु. सुंदरवाडी, झाल्टा) असे मृत्‍यू झालेल्या तरुणाचे नाव आहे. त्‍याचा भाऊ प्रथमेश, मित्र सचिन पाटील आणि पार्थ कुलकर्णी यांचा जखमींत समावेश आहे. गौरी पूजन मामाच्या घरी करण्यासाठी प्रणव आईला आणायला धाराशिवला निघाला होता. त्याला सिडको बसस्थानकापर्यंत सोडण्यासाठी प्रथमेश, सचिन व पार्थ सर्व एकाच दुचाकीवरून (क्र. एमएच २० बीई ५३१४) निघाले. सुंदरवाडीकडून सिडको बसस्थानकाकडे येत असताना हिनानगरजवळ काळ्या कारने त्यांना जोरात धडक दिली.

चौघेही रस्त्याच्या बाजूला फेकले गेले. चौघेही गंभीर जखमी झाले. वेळेत मदत न मिळाल्याने प्रणवचा घटनास्‍थळीच मृत्यू झाला. चिकलठाणा पोलीस ठाण्यातील पोलीस अंमलदार विक्रम जाधव आणि अमोल जाधव हे दारू पिऊन वाहन चालवणाऱ्यांवर कारवाई करत येत असताना त्‍यांना अपघातग्रस्त दुचाकी आणि चौघे दिसले. त्‍यांनी त्‍यांनी तातडीने १०८ क्रमांकावर फोन करून रुग्णवाहिका बोलावून घेतली. जखमींना घाटी रुग्णालयात दाखल केले. अपघाताची हद्द सिडको एमआयडीसी पोलिसांची असल्याने त्‍यांना पंचनाम्यासाठी घटनास्थळी बोलावून घेतले.

प्रणव व प्रथमेश सख्खे भाऊ असून, लहानपणीच त्‍यांचे वडील वारलेले आहेत. बचत गटाच्या कामातून आईने त्यांना शिकवले. प्रणव बार्शी येथे इंजिनिअरिंगचे शिक्षण घेत होता, तर प्रथमेश खासगी नोकरी करतो. दोघे भाऊ सुंदरवाडीत मामाकडे राहत होते. प्रणवचे मामा अतुल अमोल ढासलेकर (वय ३६, रा. सुंदरवाडी) यांच्या तक्रारीवरून सिडको एमआयडीसी पोलिसांनी कारचालकाविरुद्ध गुन्हा दाखल केला आहे. तपास पोलीस अंमलदार अरविंद मेणे करत आहेत.

बिडकीनजवळ दुचाकीला उडवले, एकाचा मृत्‍यू
छत्रपती संभाजीनगर- पैठण रोडवरील ताहेरपूर येथे अज्ञात वाहनाने दुचाकीस्वार रामदास बाजीराव वाघ (वय ४०, रा. पाटेगाव, ता. पैठण) यांना उडवले. यात त्‍यांचा जागीच मृत्यू झाला. ही घटना सोमवारी (२५ ऑगस्ट) सकाळी ११ च्या सुमारास घडली. रामदास वाघ हे डोंबाऱ्याचा खेळ व फूल विक्रीचा व्यवसाय करून कुटुंबाचा उदरनिर्वाह चालवायचे. कामानिमित्त सोमवारी सकाळी दुचाकीने (एमएच २० सीएन २४५१) पैठणला जात होते. बिडकीनजवळील ताहेरपूर येथे त्यांच्या दुचाकीला अज्ञात वाहनाने जोरात धडक दिली आणि वाहन पसार झाले. त्यांना पोलिसांनी बिडकीन येथील ग्रामीण रुग्णालयात आणले असता डॉक्टरांनी तपासून मृत घोषित केले. त्यांच्या पश्चात पत्नी, तीन मुले, तीन मुली असा परिवार आहे. घटनेची नोंद बिडकीन पोलिसांनी घेतली आहे.