छत्रपती संभाजीनगर (मेट्रोपोलिस पोस्ट वृत्तसेवा) : जुन्या भांडणाच्या कारणावरून इतका क्रूरपणा संचारला, की त्याने डोक्यापासून, चेहरा आणि हनुवटीपर्यंत चाकूने मारून २१ वर्षीय तरुणाला गंभीर जखमी केले. सध्या तरुणाची प्रकृती गंभीर आहे. त्याच्यावर एमजीएम रुग्णालयात उपचार सुरू आहेत. सोमवारी (१६ मार्च) रात्री साडेदहाच्या सुमारस जयभवानीनगरजवळील पुंडलिकनगर रोडवरील पालखी हॉटेलजवळ घडली.
कुणाल कल्याण खंडागळे (वय २१, रा. जय भवानीनगर) असे गंभीर जखमी तरुणाचे नाव आहे. प्रशांत राजेंद्र आवारे (रा. गल्ली नंबर १४, जय भवानीनगर) असे हल्लेखोराचे नाव आहे. त्याच्याविरुद्ध कुणालचा भाऊ स्वप्निल कल्याण खंडागळे (वय २४, रा. जय भवानीनगर) याने दिलेल्या तक्रारीवरून पुंडलिकनगर पोलिसांनी गुन्हा दाखल केला आहे. कुणाल हा आई, वडील व मोठ्या भावासह राहतो. त्याचा मोठा स्वप्निल खासगी नोकरी करतो. तक्रारीनुसार, सोमवारी रात्री साडेदहाच्या सुमारास स्वप्निल व त्याचा लहान भाऊ कुणाल, त्यांचा मित्र कृष्णा धनंजय पुरी असे तिघे पुंडलिकनगर रोडने घरी जय भवानीनगरकडे मोटारसायकलीने येत होते.
पालखी हॉटेलच्या बाजूला प्रशांत आवारे, त्याचे मित्र कार्तिक पिपरीकर, ओमकार धुमाळ वाढदिवस साजरा करत होते. स्वप्निल, कुणाल व कृष्णा यांनी तिथल्या जवळच्याच एका दुकानातून कोल्ड्रिंक खरेदी केले व कोल्ड्रिंक पित उभे होते. त्यांच्याकडे प्रशांत आवारे आला. त्याने कुणालसोबत झालेल्या जुन्या भांडणाच्या कारणावरून तू येथे काय करत आहेस, असे कुणालला विचारले. लगेचच शिवीगाळ करू लागला. त्यामुळे स्वप्निल, कुणाल व कृष्णा तिथून जाऊ लागले.
त्याचवेळी प्रशांतने कुणालला चाकूने डोक्यावर डाव्या बाजूला व चेहऱ्यावर हनुवटीपर्यंत मारून गंभीर जखमी केले. तुम्ही माझ्याविरुध्द पोलिसांत तक्रार केली तर तुम्हाला जीवे मारून टाकू, असे धमकावून तो पळून गेला. कुणालला गंभीर जखमी अवस्थेत एमआयटी हॉस्पिटलमध्ये दाखल करण्यात आले. तिथून एमजीएम हॉस्पिटलमध्ये हलविण्यात आले. कुणालची प्रकृती गंभीर असून, तो जबाब देण्याच्या स्थितीत नसल्याने स्वप्निलने पुंडलिकनगर पोलीस ठाण्यात तक्रार दिली. अधिक तपास पोलीस उपनिरीक्षक अर्जुन राऊत करत आहेत.
.jpg)
