राँग साइड आलेल्या जोडप्याचा पोलिसावर हल्ला!; शिवीगाळ करत महिलेने लगावला ‘फटका’!!, मील कॉर्नर चौकात काय घडलं...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : दुचाकीने राँग साइड आलेल्या जोडप्याला अडवणे वाहतूक पोलिसांना चांगलेच महागात पडले. दुचाकीस्वार पुरुषाने अंगावर धावून येत अर्वाच्‍च भाषेत शिवीगाळ केली, तर महिलेनेही शिवीगाळ करत हाताला असा फटका मारला, की पोलीस अंमलदारांच्या हातातील डिव्हाइस खाली पडून फुटले. ही घटना मील कॉर्नर चौकात शुक्रवारी (१४ नोव्‍हेंबर) सायंकाळी साडेपाचच्या सुमारास घडली. क्रांती चौक पोलिसांनी जोडप्याविरुद्ध गुन्हा दाखल केला आहे.

शहर वाहतूक शाखेचे पोलीस अंमलदार सोमनाथ बाबुराव जाधव (वय ५३) यांनी या प्रकरणात तक्रार दिली आहे. शुक्रवारी मिलकॉर्नर वाहतूक सिग्नलवर त्यांची ड्युटी होती. सोबत वाहतूक शाखेचे पोलीस अंमलदार मडावी, महिला पोलीस अंमलदार वाघमारे, पोलीस उपनिरीक्षक शिखरे होते. सायंकाळी साडेपाचच्या सुमारास एका दुचाकीवरून (MH 20 GB 9249) महिला, पुरुष बारापुल्ला गेटच्या दिशेकडून विरुद्ध बाजूने मिलकॉर्नर चौकाकडे येत होते. त्यामुळे सोमनाथ जाधव यांनी चलान देण्यासाठी डिव्हाईस मशिनमध्ये त्या दुचाकीसह चालकाचा फोटो घेतला. ते पाहून दुचाकीचालकाने दुचाकी रस्त्यातच थांबवली व आडवी लावली.

जाधव यांनी त्याला दुचाकी रस्त्याच्या बाजूला घेण्यास सांगितले असता त्याने दुचाकी रस्त्याच्या बाजूला न घेता सोबत मोठमोठ्याने बोलून हातवारे करून वाद घालून अर्वाच्च भाषेत शिवीगाळ करू लागला. त्याचवेळी दुचाकीचालकासोबत मागे बसून आलेली महिलाही जाधव यांच्यासोबत मोठमोठ्याने बोलून हातवारे करून वाद घालू लागली. जाधव हे त्यांना समजावत असताना ती महिला अचानक जाधव यांच्या अंगावर धावून आली. तिने डिव्हाईस मशिन असलेल्या हाताला तिच्या हाताने जोरात फटका मारून मशिन खाली पाडले. त्यामुळे मशिन फुटून नुकसान झाले. त्यानंतर दुचाकीचालक व त्याच्यासोबतची महिला दुचाकीवर बसून त्या ठिकाणावरून निघून गेले. अधिक तपास पोलीस उपनिरीक्षक प्रमोद खांड्रे करत आहेत.