छत्रपती संभाजीनगर (मेट्रोपोलिस पोस्ट वृत्तसेवा) : मैत्रिणीशी बोलण्याच्या संशयावरून १८ वर्षीय तरुणावर ३ तरुणांनी लोखंडी रॉडने मारहाण केली. त्यानंतर एका हल्लेखोराने थेट पिस्तुल रोखत जीवे मारण्याचा प्रयत्न केला. ही घटना बुधवारी (२६ नोव्हेंबर) सायंकाळी पावणेसहाला सलीम अली सरोवरमागे डिलक्स बेकरीच्या कन्स्ट्रक्शन साईटवर घडली.
पोलिसांनी हल्लेखोर शेख मुजमिल ताहेर शेख (वय १८) याला अटक केली असून, त्याचे सोहेल आणि अरमान सय्यद नावाचे साथीदार फरारी आहेत. हल्ला झालेला तरुण आणि हल्ला करणारे तरुण सर्व जण उच्चभ्रू कुटुंबातील आहेत. मुजमिलचे वडील कंत्राटदार आहेत. सोहेलचे वडील भंगार व्यावसायिक आहेत. मुजमिलला न्यायालयात हजर केले असता १ डिसेंबरपर्यंत पोलीस कोठडी सुनावण्यात आली. शहवेज आयान जैदी (वय १८, रा. मॉडल हौसिंग सोसायटी हिमायतबाग, दिल्लीगेट) असे हल्ला झालेल्या तरुणाचे नाव आहे.
तो सिल्लोडच्या नॅशनलमध्ये बारावी विज्ञान शाखेत शिकतो. सलीम अली सरोवरमागे डिलक्स बेकरीच्या कन्स्ट्रक्शन साईटवर शहवेज व त्याचे मित्र सॅवियो फर्नांडिस, अफान सय्यद, मोईस बागवान, जैद शेख, रैयान असे बोलत उभे होते. त्याचवेळी पांढरी फाँर्चुनर गाडी (MH 12 UC 7545) त्यांच्याजवळ येऊन थांबली. गाडीतून सोहेल, शेख मुजमिल, अरमान सय्यद उतरले. शेख मुजमिल याने बाजूला घेऊन शहवेजला, ‘तुने मेरी फ्रेंडस से बात क्यो की’ असा जाब विचारला. त्यावर शहवेजने त्याला "मैने उसका मोबाईल नंबर ब्लॉक किया’, असे सांगितले.
तरीही मुजमिलने फॉर्चुनर गाडीकडे जाऊन डिक्कीतून लोखंडी रॉड आणला आणि रॉडने शहवेजच्या तोंडावर मारले. अरमान सय्यद याने बरगडीत हाताने ठोसे मारले. त्यांच्यासोबत आलेल्या सोहेलने शहवेजवर पिस्तुल रोखली. "आज तुझे खतम कर दूँगा’, अशी धमकी दिली. त्यांच्या ताब्यातून सुटून शहवेजने पळ काढला. पिस्तुल पाहून त्याचे मित्रही पळाले. शहवेज SBH कॉलनीतील एका पार्किंगमध्ये लपून बसला व त्याच्या वडिलांना कॉल करून कळवले. त्याचा मित्र मोईस त्याला घ्यायला आला. त्याच्यासोबत शहवेज रोजेबाग येथील फंक्शन हॉलला आला. तिथे त्याचे वडीलही आले. त्यांनी सिटी चौक पोलीस ठाण्यात येऊन तक्रार दिली. अधिक तपास सहायक पोलीस निरीक्षक मनोज शिंदे करत आहेत.
