छत्रपती संभाजीनगर (सीएससीएन वृत्तसेवा) : भुरट्या चोरट्यांनीही दिवाळी साजरी केली. खडकेश्वर, पदमपुरा, सिडको एन १, गुलमंडी येथे चोरट्यांच्या कारनाम्यांनी सामान्यांना डोक्याला हात लावण्याची वेळ आली. त्या त्या पोलीस ठाण्यांत या घटनांची शुक्रवारी (१ नोव्हेंबर) नोंद झाली आहे.
-सिडको एन-१ मधील हनुमान मंदिरातील दानपेटीच चोरून नेण्याचा प्रयत्न चोरट्यांनी केला. चोरटे लोखंडी गेट तोडून पहाटे साडेचारला मंदिरात घुसरले. दानपेटी उघडून ती नेण्याचा प्रयत्न केला. चमत्कार म्हणजे २० मिनिटे चोरटे झटत होते. पण प्रयत्न करूनही पेटी जागची हलली नाही. अखेर चोरट्यांना रिकाम्या हाती परतावे लागले. ही घटना सीसीटीव्ही कॅमेऱ्यात कैद झाली.
-राहुल भारुका (२६) यांचे खडकेश्वर मंदिरासमोर जनरल स्टोअर आहे. दुकानात असताना त्यांच्याकडे तोंडाला रुमाल बांधलेला तरुण आला. ५०० रुपये देऊन तोंडाला लावायची क्रीम मागितली. क्रीम दिल्यानंतर त्याने पुन्हा आइस्क्रीम मागितले. राहुल फ्रीजकडे वळताच तरुणाने काउंटर उघडून गल्ल्यातील २५ हजार रुपये रोख घेऊन पळून गेला. गुरुवारी रात्री ८:३० वाजता ही चोरी झाली.
-पदमपुऱ्याच्या सोनार गल्लीत राहणाऱ्या नारायण सलामपुरे यांच्या घरात शुक्रवारी चोर शिरला. त्याचवेळी किचनमधून सलामपुरे हॉलमध्ये आले. त्यांना पाहून चोराने पळ काढण्याचा प्रयत्न केला. सलामपुरे यांनी आरडाओरड केल्याने लोकांनी धावून चोराला पकडले. तुफेल रजा अक्तर मेमन (वय २३, रा. आविष्कार कॉलनी) असे त्याचे नाव समोर आले.
-होनाजीनगर येथील ५० वर्षीय शीला राऊत गुरुवारी गुलमंडीत खरेदी करत असताना सुपारी हनुमान मंदिराजवळ चोरट्याने त्यांच्या पर्समध्ये हात घालून ४९ हजार रुपये व क्रेडिट कार्ड लंपास केले.
मार्केट १२ पर्यंत सुरू राहिल्याचा परिणाम…
पोलीस विधानसभा निवडणुकीच्या बंदोबस्तात व्यस्त, त्यात दिवाळी सणाचाही बंदोबस्त अशा परिस्थितीतही मध्यरात्री १२ पर्यंत काही व्यापाऱ्यांनी बाजारपेठ सुरू ठेवू देण्यासाठी केलेला हट्ट यामुळे शहरात चोरट्यांचे फावल्याचे दिसून आले. चोरट्यांनी ६२ मोबाइल, ४ मंगळसूत्रे, ३ दुचाकी वाहने चोरून नेली. महिला आणि अल्पवयीन मुलांच्या टोळ्यांनी ही कामगिरी बजावल्याचे सीसीटीव्ही कॅमेऱ्यांतील फूटेजद्वारे पोलिसांच्या समोर आले.
.jpg)
.jpg)
