खुलताबादच्या लॉजवर २२ वर्षीय तरुणीवर २९ वर्षीय तरुणाचा बलात्कार!; ब्रेकअपनंतर व्हिडीओ, फोटो डिलीट करण्यासाठी एकदा शरीरसंबंधाची घातली होती अट...

खुलताबाद (मेट्रोपोलिस पोस्ट वृत्तसेवा) : २२ वर्षीय तरुणीला लॉजवर बोलावून २९ वर्षीय तरुणाने तिच्यावर बलात्कार केला. ही घटना नंद्राबाद (ता. खुलताबाद) येथे २१ फेब्रुवारीला घडली. खुलताबाद पोलिसांनी शनिवारी (२८ फेब्रुवारी) तरुणीच्या तक्रारीवरून या प्रकरणात गुन्हा दाखल केला. पोलिसांच्या सांगण्यावरून तरुणीने प्रियकराला लाडीगोडी लावून बोलावून घेतले अन्‌ तो येताच पोलिसांनी मुसक्या आवळल्या. यश ऊर्फ गौरव दत्तू गायकवाड (वय २९, रा. अंगुरीबाग-फकीरवाडी, छत्रपती संभाजीनगर) असे संशयिताचे नाव आहे. न्यायालयात हजर केले असता, त्याला ३ मार्चपर्यंत पोलीस कोठडी सुनावण्यात आली.

पोलीस सूत्रांच्या माहितीनुसार, यश आणि तक्रारदार तरुणी काही वर्षांपूर्वी एका दुकानात एकत्र कामाला होते. तिथे त्यांच्यात ओळख, मैत्री आणि मैत्रीतून प्रेमसंबंध निर्माण झाले. कालांतराने त्यांचे ब्रेकअप झाले. काही महिन्यांपूर्वी यश मुंबईला गेला होता. महिनाभरापूर्वी तो छत्रपती संभाजीनगरमध्ये परतला. त्याने पुन्हा तरुणीशी संपर्क केला. मात्र तिने संबंध पुन्हा सुरू करण्यास नकार दिल्याने त्याने धमकावले, की माझ्याकडे तुझे जुने फोटो आणि व्हिडीओ आहेत. ते डिलिट करण्यासाठी तुला मला एकदा भेटावे लागेल आणि शारीरिक संबंध ठेवावे लागतील. त्यामुळे घाबरलेल्या तरुणीने त्याची अट मान्य केली. त्यानुसार २१ फेब्रुवारीला दोघे नंद्राबादच्या एका लॉजवर गेले.

तिथे तरुणाने तिच्याशी जबरदस्ती शारीरिक संबंध ठेवले. संबंध झाल्यानंतर माझ्याकडे कोणतेही फोटो किंवा व्हिडीओ नाहीत, असे तिला सांगितले. त्यामुळे तरुणीला फसवणूक झाल्याची जाणीव झाली. तिने मैत्रिणींच्या मदतीने पोलिसांत धाव घेतली. मात्र घटनास्‍थळ खुलताबाद असल्याने हा गुन्हा खुलताबाद पोलीस ठाण्यात वर्ग करण्यात आला. खुलताबाद पोलिसांनी २८ फेब्रुवारीला गुन्हा दाखल करून तरुणीच्या मदतीनेच यशला बोलावून अटक केली. अधिक तपास उपविभागीय पोलीस अधिकारी अपराजिता अग्निहोत्री यांच्या मार्गदर्शनाखाली पोलीस निरीक्षक धनंजय फराटे, पोलीस उपनिरीक्षक राजेश पाटील आणि योगेश ताठे करत आहेत. सोमवारी (२ मार्च) फॉरेन्सिक लॅबने लॉजमधील दोघांनी शरीरसंबंध ठेवलेल्या रूमची तपासणी केली.