छत्रपती संभाजीनगर (मेट्रोपोलिस पोस्ट वृत्तसेवा) : लेक-सुनेला भेटायला पुण्याला गेलेल्या वृद्धेचे बंद घर फोडून चोरट्यांनी सोने-चांदीच्या दागिन्यांसह रोकड असा एकूण पावणेदोन लाख रुपयांचा मुद्देमाल चोरून नेला. ही घटना उल्कानगरीत रविवारी (१ मार्च) सकाळी ९ च्या सुमारास समोर आली. जवाहरनगर पोलिसांनी चोरट्याविरुद्ध सोमवारी (२ मार्च) गुन्हा दाखल केला आहे.
वनश्री संदीप पाडळकर (वय ५३, रा. उल्कानगरी, गारखेडा परिसर, छत्रपती संभाजीनगर ह. मु. आनंद पार्क मेन लेन, पुणे) यांनी या प्रकरणात तक्रार दिली आहे. त्या व त्यांचे पती पुण्यात खासगी नोकरी करतात. कामानिमित्ताने पुण्यात राहतात. त्यांची सासूबाई अरुणा पंढरीनाथ पाडळकर (वय ७५) एकट्याच उल्कानगरीतील घरी राहतात. २१ फेब्रुवारीला सकाळी सहाला सासूबाई घराच्या दरवाजाला कुलूप लावून लेक-सुनेला भेटण्यासाठी पुण्याला गेल्या होत्या.
रविवारी (१ मार्च) सकाळी ९ च्या सुमारास त्यांच्या कॉलनीत माळी काम करणारे वाल्मिकी माळी यांनी वनश्री यांना कॉल करून सांगितले, की तुमच्या घराचा दरवाजा उघडा आहे. त्यामुळे वनश्री यांनी चुलत दीर संजय जगन्नाथ पाडळकर यांना कळवले. त्यानंतर वनश्री याही पतीसह पुण्यावरून छत्रपती संभाजीनगरला आले. घराची पाहणी केली असता घरातील सामान अस्ताव्यस्त दिसून आले. कपाटात ठेवलेल्या सामानाची पाहणी केली असता सोने, चांदीचे दागिने, इतर वस्तू व नगदी पैसे मिळून आले नाहीत.
यात ८० हजारांचे, ११ ग्रॅमचे सोन्याचे कानातले टॉप्स, १ लाख रुपयांचे, अर्धा किलोचे चांदीचे भांडे यात तुपाचे भांडे, चांदीचा चमचा, फुलपात्र, समई, निरंजन, वाटी, चांदीचा गणपती, नाणी, नोट, फुले, पंचपाळ, करंडा, ७ हजार रुपये रोख असा एकूण १ लाख ८७ हजार रुपयांचा मुद्देमाल चोरीला गेल्याचे दिसून आले. चोट्याने घराच्या दरवाजाचे कुलूप तोडून आत प्रवेश करत चोरी केल्याचे तक्रारीत म्हटले आहे. अधिक तपास पोलीस अंमलदार कल्याण पदार करत आहेत.
.jpeg)
.jpg)
