Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
नागपूर (सीएससीएन न्यूजडेस्क) : लग्नानंतरही त्याने प्रेयसीला सोडले नाही. त्यामुळे पत्नी सोडून गेली. त्यानंतर प्रेयसीनेही त्याच्याशी लग्नास नकार दिला. त्यामुळे संतापून तरुणाने अविवाहित प्रेयसीचा गळा धारदार लोखंडी पट्टीने गळा चिरला. विरोध करताना तिची हाताची बोटेही चिरली गेली. ही थरारक घटना खापरखेडा (ता. सावनेर) पोलीस ठाण्याच्या हद्दीतील गुमथी (ता. कामठी) येथे गुरुवारी (७ ऑगस्ट) सकाळी ११ वाजताच्या सुमारास घडली. पोलिसांनी प्रियकरास गुरुवारीच रात्री ७ वाजताच्या सुमारास अटक केली.
रोशन ऊर्फ राकेश दीपक सोनेकर (वय ३२, रा. गुमथी, ता. कामठी) असे अटक केलेल्या प्रियकराचे नाव आहे. त्याचे गुमथी येथील २१ वर्षीय तरुणीसोबत प्रेमसंबंध होते. मध्यंतरी त्याचे दुसऱ्या तरुणीशी लग्न झाले. मात्र, त्याचे प्रेमसंबंध कायम राहिल्याने २०२३ मध्ये पत्नीने सोडचिठ्ठी घेतली. त्यानंतर त्याला दारूचे व्यसनही जडले. तोपर्यंत प्रेयसीच्या मनातही त्याची ओढ हळूहळू कमी झाली. तिने त्याला लग्न करण्यास नकार दिला होता. त्यामुळे रोशन गुरुवारी सकाळी तिच्या घरी गेला.
मात्र, ती तिच्या घराजवळील हनुमान मंदिराकडे दर्शनाला गेली होती. दर्शन घेऊन येताच त्याने धारदार लोखंडी पट्टीने तिचा गळा चिरला. या झटापटीत तिच्या हाताच्या बोटांना जखमी झाल्याने आरडाओरड करताच तिची आई व मावशी बाहेर आल्या. त्यांना पाहताच रोशन पळून गेला. कुटुंबीयांनी तिला लगेच नागपूर शहरातील खासगी हॉस्पिटलमध्ये भरती केले. खापरखेडा पोलिसांनी त्याच्या विरोधात गुन्हा नोंदवून त्याला रात्री ७ वाजताच्या सुमारास दहेगाव (रंगारी) परिसरातून ताब्यात घेत अटक केली.
याआधी केली होती बेदम मारहाण... यापूर्वी रोशनने प्रेयसीला २५ एप्रिल २०२५ रोजी कोराडी नाक्यावर बेदम मारहाण केली होती. त्याने तिला दुचाकीवर बसून सोबत चलण्याचा हट्ट केला असता तिने नकार दिला होता. त्यामुळे त्याने तिला सर्वांसमक्ष मारहाण केली होती. त्यानंतर एकदा त्याने तिच्या घरात शिरून तिला मारहाण केली. या घटनेबाबत प्रेयसीने कोराडी पोलिस ठाण्यात तक्रार नोंदविली होती.
.jpg)
