पैठण (मेट्रोपोलिस पोस्ट वृत्तसेवा) : केकत जळगाव (ता. पैठण) येथील अल्पभूधारक शेतकरी भास्कर बाबुराव मगर (वय ३५) यांनी कर्जबाजारीपणाला कंटाळून शेतातील लिंबाच्या झाडाला गळफास घेत आत्महत्या केली. ही दुर्दैवी घटना शुक्रवारी (१३ मार्च) सकाळी समोर आली.
भास्कर यांनी शेतीसाठी काही जणांकडून हातउसने पैसे घेतले होते. मात्र शेतीत अपेक्षित उत्पन्न न मिळाल्याने पैसे परत करण्याची चिंता त्यांना सतावत होती. त्यांनी आपल्या शेतात झाडाला गळफास घेतला. माहिती मिळताच पाचोड पोलीस ठाण्याचे सहायक पोलीस निरीक्षक सचिन पंडित, पोलीस उपनिरीक्षक महादेव नाईकवाडे, अंमलदार किशोर शिंदे यांनी घटनास्थळी धाव घेतली. मगर यांच्या पार्थिवावर शुक्रवारी दुपारी अंत्यसंस्कार करण्यात आले. त्यांच्या पश्चात आई-वडील, पत्नी, मुलगा, मुलगी असा परिवार आहे. पाचोड पोलिसांनी आकस्मिक मृत्यूची नोंद केली आहे.
मजुराची गळफास घेऊन आत्महत्याफुलंब्री तालुक्यातील मानमोडी शिवारात मुकेश रमेश जमरा (वय २५, रा. सराई, ता. जि. खंडवा, मध्य प्रदेश) या परप्रांतीय मजुराने गळफास घेऊन आत्महत्या केली. ही घटना शुक्रवारी (१३ मार्च) सकाळी १० वाजता समोर आली. मुकेश सहा महिन्यांपूर्वी गावाकडून फुलंब्री येथे कामासाठी आला होता. तो एका अद्रक व्यापाऱ्याकडे अद्रक धुण्याचे काम करत होता. गुरुवारी (१२ मार्च) मध्यरात्रीच्या सुमारास त्याने मानमोडी परिसरातील शेतात आंब्याच्या झाडाला गळफास घेतला. शुक्रवारी सकाळी ही बाब लक्षात आली. फुलंब्री पोलिसांनी घटनास्थळी धाव घेतली. मृतदेह खाली उतरवून फुलंब्री ग्रामीण रुग्णालयात आणण्यात आला. शवविच्छेदनानंतर नातेवाइकांच्या ताब्यात देण्यात आला. त्यानंतर नातेवाइक मृतदेह घेऊन गावाकडे रवाना झाले. मुकेशच्या आत्महत्येचे कारण अद्याप समोर आलेले नाही. तपास पोलीस अंमलदार रमेश सोनुने करत आहेत.
.jpeg)
