बौद्ध समाजमंदिरावर चालवला जेसीबी!; पाडळसा उपसरपंचाचे कृत्य, गंगापूर तालुक्यातील खळबळजनक घटना

गंगापूर (मेट्रोपोलिस पोस्ट वृत्तसेवा) : पाडळसा (ता. गंगापूर) येथे उपसरपंच अरुण सोनवणे याने साथीदारांसह मिळून सार्वजनिक बौद्ध समाजमंदिरावर बुलडोझर चालवले. समाजमंदिर पाडल्याबद्दल जाब विचारण्यास गेलेल्या ३० वर्षीय महिलेला जातिवाचक शिवीगाळ केली. या प्रकरणी शिल्लेगाव पोलिसांनी उपसरपंचासह त्याचे साथीदार खंडू पवार (रा. पाडळसा) व जेसीबी चालक (नाव माहीत नाही, रा. नांगरे बाभूळगाव, ता. गंगापूर) यांच्याविरुद्ध गुन्हा दाखल केला आहे. ही धक्कादायक घटना शुक्रवारी (१३ मार्च) सकाळी १० च्या सुमारास घडली. रात्री पावणेनऊच्या सुमारास पोलिसांत तक्रार करण्यात आली.

पोलीस सूत्रांच्या माहितीनुसार, मंगल सुनील हिवाळे (वय ३०, रा. पाडळसा) यांनी या प्रकरणात तक्रार दिली आहे. उपसरपंच व त्याच्या साथीदारांनी गावातील सार्वजनिक बौद्ध समाजमंदिर जेसीबीद्वारे पाडून हिवाळे यांच्यासह अन्य लोकांच्या भावना दुखावल्या. मंगल हिवाळे या उपसरपंच व त्याच्या साथीदारांना विचारणा करण्यास गेल्या असता जातिवाचक शिवीगाळ करून, अपमानित करून, तू काही करू शकत नाही, असे म्हटल्याचे तक्रारीत नमूद आहे. अधिक तपास उपविभागीय पोलीस अधिकारी नीलेश पालवे करत आहेत. दरम्यान, या प्रकरणात अद्याप कुणालाही अटक नसल्याने समाजमंदिर पाडण्याचे कारण समोर आले नसल्याचे पोलीस सूत्रांनी सांगितले.

या प्रकरणातील फिर्यादी मंगल हिवाळे यांनी ‘मेट्रोपोलिस पोस्ट’शी बोलताना सांगितले, की समाजमंदिर पाडण्याची आम्हाला पूर्वकल्पनाही दिली नाही. अचानक समाजमंदिर पाडतानाचा आवाज झाल्याने आम्ही तिथे धावलो. आम्हाला समाजमंदिरातील सामानही काढून घेण्याचा वेळ दिला नाही. त्याआधी तिथे काहीतरी बांधकाम करण्यासंदर्भात बैठक घेऊ असे सांगण्यात आले होते. मात्र बैठकही घेतली नाही आणि अचानक जेसीबी समाजमंदिरावर चालवला आहे. जातिवाचक शिवीगाळ केली. आम्ही आज दुपारी १२ पर्यंत पोलीस काय कारवाई करतात, हे पाहू, त्यानंतर पुढील भूमिका ठरवू, असे त्या म्हणाल्या.