National News : सनातन धर्माचा अपमान सहन करणार नाही म्हणत वकिलाने सरन्यायाधीश गवईंवर फेकला बूट!

नवी दिल्ली (मेट्रोपोलिस पोस्ट वृत्तपत्राच्या सौजन्याने) : सनातन धर्माचा अपमान सहन करणार नाही, अशा घोषणा देत एका वकिलाने भर न्यायालयात सरन्यायाधीश भूषण गवई यांच्यावर बूट फेकण्याचा प्रयत्न केल्याची घटना घडल्याने देशभर खळबळ उडाली आहे. सोमवारी (६ ऑक्‍टोबर) एका खटल्याचे कामकाज सुरू असतानाच हा प्रकार घडला. हल्लेखोर वकिलाचे नाव राकेश किशोर (वय ७१) असून, तो २०११ पासून सर्वोच्च न्यायालयात वकिली करतो.

राकेश सरन्यायाधीशांसमोर आला. पायातील बूट काढून गवई यांच्या दिशेने भिरकावला. सुरक्षारक्षकांनी सावध होऊन लगेचच राकेशला ताब्यात घेतले व न्यायालयाबाहेर नेले. घटनेमुळे सर्वोच्च न्यायालय परिसरातील सुरक्षा व्यवस्था कडक केली आहे. घटनेच्या सखोल चौकशीचे आदेश देण्यात आले आहेत. दरम्‍यान, या घटनेवर बोलताना पंतप्रधान नरेंद्र मोदी म्हणाले, की सरन्यायाधीशांवरील हल्ल्याच्या घटनेने सर्व भारतीय नाराज झाले आहेत. अशा कृत्यांना समाजात कोणतेही स्थान नाही. कृत्य निषेधार्हच आहे. या परिस्थितीतही सरन्यायाधीशांचे वर्तन आपल्या राज्यघटनेच्या भावनेला बळकटी देणारे आहे. न्यायाच्या मूल्यांप्रती त्यांच्या बांधिलकीचे प्रतीक आहे, असे ते म्हणाले.

गुन्हा दाखल नाही...
राकेशला दिल्ली पोलिसांनी ३ तास चौकशी करून सोडून दिले. सर्वोच्च न्यायालयाच्या रजिस्ट्रार जनरल यांनी या प्रकरणात कोणताही गुन्हा दाखल करण्यास नकार दिल्याचे कारण यासाठी देण्यात आले. घटनेनंतर सरन्यायाधीश गवई यांनी कामकाजही थांबवले नाही. अशा घटनेने कोणीही विचलित होऊ नये. मीही झालेलो नाही. अशा घटनांचा माझ्यावर काही परिणाम होत नाही, अशी प्रतिक्रिया त्यांनी दिली. बार कौन्सिल ऑफ इंडियाने राकेशचे तत्काळ निलंबन केले आहे.