विद्यापीठाकडून महाविद्यालयांना उद्यापासून ४ नोव्हेंबरपर्यंत सुट्टी, विद्यापीठ कॅम्प्‌सलाही २८ ऑक्‍टोबरपर्यंत सुट्टी

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : डॉ. बाबासाहेब आंबेडकर मराठवाडा विद्यापीठाशी संलग्नित महाविद्यालयांना १५ ऑक्टोबर ते ४ नोव्हेंबर दरम्यान दीपावली सुट्टी जाहीर करण्यात आली आहे.

कुलगुरू डॉ. विजय फुलारी यांच्या मार्गदर्शनाखाली नवीन शैक्षणिक सत्र सुरू होण्याच्या दिवशी म्हणजेच १६ जून २०२५ रोजी शैक्षणिक वेळापत्रक जाहीर करण्यात आले. या वेळापत्रकाचे तंतोतंत पालन करण्यात येत आहे. यानुसार युवक महोत्सव, आविष्कार महोत्सव घेण्यात आला. १५ ऑक्टोबरपासून दीपावली सुट्टी असणार आहे. ४ नोव्हेंबरपर्यंत ही सुट्टी राहील तर ५ नोव्हेंबर रोजी द्वितीय सत्र सुरू होणार आहे, असे शैक्षणिक विभागाचे उपकुलसचिव डॉ. गणेश मंझा यांनी कळविले आहे.

विद्यापीठ कॅम्पसला १७ दिवस सुट्टी
डॉ. बाबासाहेब आंबेडकर मराठवाडा विद्यापीठाचा छत्रपती संभाजीनगर येथील मुख्य परिसर व धाराशिव उपपरिसर या ठिकाणी १२ ते २८ ऑक्टोबर या दरम्यान शैक्षणिक विभागांना सुट्टी राहील, तर दोन्ही ठिकाणच्या प्रशासकीय विभागांना १८ ते २६ ऑक्टोबर अशी नऊ दिवसांची सुट्टी असणार आहे. या काळात विद्यापीठातील परीक्षा, लेखा, अस्थापना आदी सर्व प्रशासकीय विभागांनाही सुट्टी राहील, असे कुलसचिव डॉ. प्रशांत अमृतकर यांनी कळविले आहे. विद्यापीठातील प्रशासकीय विभाग २७ तर शैक्षणिक विभाग २९ ऑक्टोबर रोजी सुरू होणार आहेत.