महाराष्ट्र पुन्हा हादरला : बदलापुरात ४ वर्षीय चिमुकलीवर स्‍कूलव्हॅन चालकाकडून लैंगिक अत्याचार!

ठाणे (मेट्रोपोलिस वृत्तसेवा) : ठाणे जिल्ह्यातील बदलापूर पश्चिम परिसरातून संतापजनक घटना समोर आली आहे. शाळेतून घरी परतणाऱ्या चार वर्षीय मुलीवर तिच्या स्‍कूल व्हॅन चालकानेच लैंगिक अत्याचार केल्याचे समोर आले असून, यावेळी त्या मुलीला मारहाणदेखील करण्यात आल्याचे पुढे आले आहे. या घटनेमुळे बदलापूर परिसरात संतापाची लाट उसळली आहे.

बदलापूर पश्चिमेकडील एका खासगी शाळेत शिकणारी चार वर्षांची चिमुकली नेहमीप्रमाणे स्कूल व्हॅनमधून शाळेत जायची आणि दुपारी घरी परतायची. मात्र, बुधवारी ती ठरलेल्या वेळेत ती घरी परतली नाही. यामुळे तिच्या आईने व्हॅन चालकाला फोन करून चौकशी केली. त्याने ती लवकरच घरी येईल, असे सांगितले. चिमुकली तब्बल दीड तास उशिरा घरी परतली, यावेळी ती भेदरलेल्या अवस्थेत होती. आईने चौकशी केल्यावर तिने गुप्तांगाला हात लावून, व्हॅन चालकाचे नाव घेतले. तसेच व्हॅन चालकाने आपल्याला मारहाण केल्याची माहितीही तिने दिली. पाहणी केल्यानंतर चिमुकलीचे पालक घाबरून गेले. त्यांनी तत्काळ पोलीस ठाण्यात धाव घेतली.

आरोपी चालकाला अटक : प्रकरणाचे गांभीर्य लक्षात घेऊन पोलिसांनी तत्काळ संबंधित हालचाली करत व्हॅन चालकावर गंभीर कलमान्वये गुन्हे दाखल केले. तसेच पथक पाठवून त्या चालकाला अटक करण्यात आली.नंतर या चिमुकलीची वैद्यकीय तपासणी करण्यात आली. 
व्हॅन फोडण्याचा प्रयत्न : व्हॅन चालकाने चिमुकलीवर लैंगिक अत्याचार केल्याची माहिती काही वेळातच परिसरात पसरली. काही वेळातच जमाव जमा झाला. त्यांनी पोलीस ठाणे परिसरात येऊन तत्काळ गंभीर कारवाईची मागणी केली. 'राष्ट्रवादी'च्या संगीता चेंदवणकर याही सहकाऱ्यांसह पोलीस ठाण्यात पोहोचल्या. याच काळात पोलिसांनी संबंधित स्कूल व्हॅन पोलीस ठाण्यात आणली होती. चेंदवणकर यांनी या व्हॅनची तोडफोड करण्याचा प्रयत्न केला. दरम्यान, या प्रकारामुळे बदलापुरातील वातावरण तापले असून, पोलीस पुढील कारवाई करीत आहेत.