छत्रपती संभाजीनगर (मेट्रोपोलिस पोस्ट वृत्तसेवा) : नवव्या बैठकीतही जागा वाटपाचा पेच न सुटल्याने अखेर भाजप आणि शिंदे गटाच्या कोअर कमिट्यांनी हा निर्णय आता मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या कोर्टात ढकलला आहे. आज, २७ डिसेंबरला सकाळी १० ते दुपारी ४ अशी ६ तास बैठक चालली. मंत्री अतुल सावे, मंत्री संजय शिरसाट, खा.डॉ. भागवत कराड, खा. संदिपान भुमरे यांच्यासह कोअर कमिट्यांचे सदस्य हजर होते. पण जागा वाटपावर शिक्कामोर्तब होऊ शकले नाही. मोठ्या दबावाखाली बैठक सुरू झाली, तशीच संपली.
शुक्रवारी बैठकीनंतर मंत्री अतुल सावे यांनी शनिवारी रात्रीपर्यंत युतीवर शिक्कामोर्तब होईल, असे म्हटले होते. मात्र बराच खल होऊनही कुणीच पडते घ्यायला तयार नसल्याने अखेर आता वरिष्ठ पातळीवर निर्णय घेण्याचा अधिकार देण्याचे ठरले. फडणवीस, शिंदे आणि चंद्रशेखर बावनकुळे यांना सविस्तर पत्र पाठवून निर्णय घेण्याची विनंती करण्यात आली आहे. महायुती भक्कम आहे. मात्र जागा वाटपाच्या अडचणींमुळे विलंब होत असल्याचे दोन्ही मंत्र्यांनी सांगत लवकरच यावर मुंबईतून शिक्कामोर्तब होईल, अशी आशा व्यक्त केली. ठराविक जागांसाठी दोन्ही पक्ष अडून बसल्याने हा पेच निर्माण झाल्याचे बैठकीतील सूत्रांनी सांगितले. आजची नववी बैठक खा.डॉ. भागवत कराड यांच्या निवासस्थानी झाली. या वेळी सावे, शिरसाट, भुमरे, डॉ. कराडांशिवाय आमदार संजय केनेकर, माजी आमदार किशनचंद तनवाणी, माजी महापौर विकास जैन, शिंदे गट जिल्हाप्रमुख राजेंद्र जंजाळ, भाजप शहराध्यक्ष किशोर शितोळे, निवडणूक प्रमुख समीर राजूरकर, ऋषिकेश जैस्वाल उपस्थित होते.
जागा वाटपाचा प्रवास... १. प्रारंभी शिंदे गटाने २०१५ चा फॉर्म्यूला पुढे केला होता. त्यानुसार ३८ जागांवर शिंदे गटाने दावा केला होता. भाजपला २३ जागा आणि उरलेल्या जागांचे समान वाटप अशी भूमिका शिंदे गटाने घेतली होती.
२.भाजपचे मंत्री अतुल सावे यांनी फिफ्टी- फिफ्टीचा फॉर्म्यूला मांडला होता.
३.भाजपने भूमिका बदलत ५५ जागांवर दावा सांगत ३३ जागा शिंदे गटाने लढवाव्यात असे म्हटले.
४.शिंदे गट जास्त जागा मागत असल्याने पेच कायम असल्याचे सांगण्यात येत आहे.
इच्छुकांचा प्लॅन बी...प्रत्येक प्रभागातून भाजप आणि शिंदे गटाच्या पदाधिकाऱ्यांनी महापालिका निवडणुकीची तयारी केली आहे. महायुती झाल्यास पक्षाचे तिकीट मिळणार नसल्याने अनेकांचा हिरमोड होणार आहे. गेल्या काही दिवसांत भाजप, शिंदे गटात अनेकांनी प्रवेश केला आहे. तेही नगरसेवकपदाचे तिकीट मिळणार असल्याच्याच आमिषाने आले आहेत. त्यामुळे आधीच इच्छुक, त्यात पडलेली भर यामुळे तिकीट वाटप करताना दोन्ही पक्षांची चांगलीच गोची होणार आहे. अनेकांनी तर प्लॅन बी तयार ठेवला आहे. भाजप, शिंदे गटाकडून तिकीट मिळाले नाही तर ठाकरे गट किंवा अन्य पक्षांकडून तिकीट मिळविण्याची तयारी त्यांनी केली आहे.
.jpg)
.jpg)
