भुमरे पिता-पुत्राने केली गोची!; एकनाथ शिंदेंनी लावला डोक्याला हात!!, नक्की काय घडलं...

छत्रपती संभाजीनगर (मेट्रोपोलिस पोस्ट वृत्तसेवा) : मुख्यमंत्रिपदाची खुर्ची गेली तेव्हा हंबरडा फोडला, खासदार पडले तेव्हा हंबरडा फोडला आणि विधानसभा निवडणुकीत आमदार पडले तेव्हा हंबरडा फोडला, आता आणखी किती वेळा हंबरडा फोडणार आहात, असा सवाल उपमुख्यमंत्री एकनाथ शिंदे यांनी करत उद्धव ठाकरेंवर जोरदार टीका केली. मात्र मात्र खासदार संदिपान भुमरे यांना बोलण्याच्या आवेशात काय बोलतोय हेच लक्षात आलं नसावं. त्यांनी एकनाथ शिंदेंना डोक्याला लावण्याची वेळ आणली. भाषणासाठी उभे राहिल्यावर भुमरे म्हणाले, की उद्धव ठाकरेंना हंबरडा मोर्चा काढण्याचा अधिकार नाही. कुणी काहीही म्हणो, हंबरडा आमच्या एकनाथ शिंदे साहेबांचा फुटणार...  दुसरीकडे त्यांचे पूत्र आ. विलास भुमरे यांनीही काही क्षण शिंदेंना चिंतित केले. ते म्हणाले, की निवडणुकीत २० हजार मतदान बाहेरून आणले. शिंदे यांनी त्यांच्यात वाक्यात सुधारणा केली. तुमच्या मतदारसंघातील पण बाहेर राहणारे असे तुम्हाला म्हणायचे आहे का, असे विचारल्यावर आ. भुमरेंना शाब्दिक चुकीमुळे गैरसमज होण्याची शक्यता लक्षात आली. त्यांनी लगेचच मतदारसंघातीलच पण बाहेरगावी राहणारे मतदानाच्या दिवशीच आणले, असा खुलासा केला.