मर्सिडीजच्या एका बाजूचे दोन्ही टायर फुटले, मंत्री संजय शिरसाट सुदैवाने वाचले!; बजाजनगरच्या प्रचारसभेत कार्यकर्त्यांच्या काळजाचा ठोका चुकला...

छत्रपती संभाजीनगर (मेट्रोपोलिस पोस्ट वृत्तसेवा) : काल माझीही वेळ आली होती. पण थोडक्यात वाचलो. परभणीवरून एका कार्यक्रमावरून परत येताना गेवराईजवळ गाडी खड्ड्यात आदळली अन् गाडीचे डाव्या साइडचे दोन्ही टायर फुटले. गाडी साधीसुधी नव्हती मर्सिडीज होती. दुसऱ्या गाडीत मी बसून आलो. अपघात झालेली गाडी आतापर्यंत घरी आली नाही. माणसाच्या आयुष्याचा भरोसा नाही. काल मला काही झालं असतं तर तुम्ही मला श्रद्धांजली वाहिली असती, अशी धक्कादायक माहिती मंत्री संजय शिरसाट यांनी दिल्याने उपस्थित कार्यकर्त्यांच्या काळजाचा ठोका चुकला...

छत्रपती संभाजीनगर जिल्ह्यात जिल्हा परिषद, पंचायत समिती निवडणुकांची रणधुमाळी सुरू असून, शिंदे गटाचे अधिकाधिक उमेदवार निवडून आणण्यासाठी मंत्री संजय शिरसाट यांनी कंबर कसली आहे. लागोपाठ त्यांच्या प्रचारसभा होत आहेत. अशातच त्यांना सामोरे जावे लागलेल्या दुर्घटनेची माहिती समोर आल्याने शिंदे गटात खळबळ उडाली आहे. बजाजनगरमधील प्रचारसभेत मंत्री शिरसाट म्हणाले, की अजितदादा अचानक गेले, कुणाला वाटलं तरी होतं का? काल माझीही वेळ आली होती. थोडक्यात वाचलो. मी सगळ्यांना सांगतो. आजचा दिवस चांगला जाऊ द्या. उद्याची चिंता करू नका. उमेदवारांनो, तुम्हीही काही टेन्शन घेऊ नका. मी जेवढा नम्र वागतो तेवढंच तुम्हीही लोकांशी नम्र वागा, असा सल्ला उमेदवारांना देत ते म्हणाले, की तुमच्या भागात काहीच कमी पडणार नाही. मी राज्यात सर्वाधिक बजेटवाला मंत्री आहे. साडेबावीस हजार कोटी रुपयांचे बजेट माझ्या एकट्याचं आहे. मी आमदार कुठला आहे, बजाजनगरचा, असं त्यांनी म्हणताच टाळ्यांचा कडकडाट झाला.

विरोधक उमेदवारावर टीका करताना मंत्री शिरसाट म्हणाले, की एक उमेदवार आहे. फोन पे करतोय. ही फोन पे काय भानगड आहे? म्हणे मतदारांना विकत घेऊ. त्यांना फोन पेवर पैसे टाकू. अरे चांगले धंदे कर. कशाला नादाला लागतो? लोकांना मूर्ख बनवणं एवढं सोपं आहे का? गेल्या २० वर्षांपासून मी आमदार आहे. कधी तरी तुम्हाला वाटलं का हा आमदार आहे, मंत्री आहे म्हणून. आपल्या घरातला वाटतो ना? माझं कुटुंब तुमच्यासोबत काम करतं. मी पालक मंत्र्यांची बायको आहे, मी पालकमंत्र्यांची मुलगी आहे, असं कधी आम्ही दाखवलं का? तुमचा आशीर्वाद पाठिशी आहे, म्हणून आम्ही आहोत, असे शिरसाट म्हणाले.