बाजारसावंगी गटात प्रशांत बंब, सतीश चव्हाण यांच्यासह डोणगावकरांचीही प्रतिष्ठा पणाला, पण घडणार व्टिस्ट...

खुलताबाद (मेट्रोपोलिस पोस्ट वृत्तसेवा) : तालुक्यातील जिल्हा परिषदेचा बाजारसावंगी गट भारतीय जनता पक्ष राखणार की राष्ट्रवादी काँग्रेस किंवा काँग्रेसचा उमेदवार या वेळी बाजी मारणार, याकडे खुलताबाद -गंगापूर विधानसभा मतदारसंघाचे लक्ष लागून राहिले आहे. येथे आपल्याच पक्षाचा उमेदवार निवडून यावा, यासाठी भाजपचे आमदार प्रशांत बंब, राष्ट्रवादी काँग्रेसचे आमदार सतीश चव्हाण यांच्यासह काँग्रेसचे जिल्हाध्यक्ष किरण पाटील डोणगावकर यांनी प्रतिष्ठा पणाला लावली आहे. असे असले तरी या गटातून जिल्हा परिषदेचा सदस्य कोण असेल याचा फैसला ८ हजार मुस्लिम मते घेतील, असे उघडपणे बोलले जात आहे. 

२९ हजार ४६७ मते असलेल्या बाजारसावंगी गटात तूर्तास तिरंगी लढत पाहायला मिळत आहे. येथे भाजपच्या प्रतीक्षा विकास कापसे, राष्ट्रवादी काँग्रेसच्या सुनीता विजय अधाने आणि काँग्रेसच्या रेखा सोमीनाथ गायकवाड या नशीब आजमावत आहेत. या तिघींसाठी आ. बंब, जिल्हा परिषदेचे माजी उपाध्यक्ष एल.जी. गायकवाड, राष्ट्रवादीचे आ. चव्हाण तर काँग्रेसतर्फे डोणगावकर प्रयत्नरत आहेत. आतापर्यंत जिल्हा परिषदेला दोन वेळा उपाध्यक्ष देणाऱ्या या गटात तब्बल ८ हजार मुस्लिम मते आहेत. ही मते ज्या मतदाराच्या पारड्यात जातील, त्यांचा विजय निश्चित मानला जात आहे. त्यामुळे ही मते आपल्या बाजूने वळविण्यासाठी उमेदवारांसह त्यांच्या नेत्यांनी मोर्चेबांधणी सुरू केली आहे.

पंचायत समिती गणांतही तिरंगी लढत 
बाजारसावंगी गटात बाजारसावंगी आणि टाकळी राजेराय हे पंचायत समितीचे दोन गण आहेत. या दोन्ही गणांतही तिरंगी लढत होत आहे. यात बाजारसावंगी गणात भाजपकडून उषा काटकर, राष्ट्रवादीच्या अंजना साळुंके तर काँग्रेसतर्फे सागर काटकर हे नशीब आजमावत आहेत. टाकळी राजेराय गणात भाजपचे देविदास भागडे, राष्ट्रवादीचे सुरेश जाधव आणि काँग्रेसचे सोहेल पटेल यांच्यात सामना होत आहे.