ठाकरे गटाला आणखी एक मोठे भगदाड!; उपजिल्हाप्रमुख बप्पा दळवींसह ‘पश्चिम’चे ४० पदाधिकारी शिंदे गटात दाखल

छत्रपती संभाजीनगर (सीएससीएन वृत्तसेवा) : ठाकरे गटाचे पदाधिकारी शिंदे गटात जाण्याचे सत्र सुरूच आहे. ऐन विधानसभा निवडणुकीच्या तोंडावर या घटना घडत असल्याने ठाकरे गटाची चिंता वाढली आहे. मंगळवारी (१६ ऑक्‍टोबर) ठाकरे गटाचे उपजिल्हाप्रमुख बप्पा दळवी यांच्यासह ४० पदाधिकाऱ्यांनी मुख्यमंत्री एकनाथ शिंदे यांच्या उपस्थितीत शिंदे गटात प्रवेश केला.

आ. अंबादास दानवे आणि माजी खासदार चंद्रकांत खैरे यांच्यातील धुसफूस आणि त्‍यातून शिवसैनिकांची होणारी कोंडी यामुळे ठाकरे गटातील पदाधिकारी, कार्यकर्त्यांतील नाराजी वाढत चालली आहे. गेल्या आठवड्यात शहरप्रमुख विजय वाघचौरे, उपजिल्हाप्रमुख संजय बारवाल, माजी नगरसेविका शोभा काळे यांनी शिंदे गटात प्रवेश केला होता. जय भवानीनगरातील प्रकाश धुर्वे यांनीही शेकडो समर्थकांसह भाजपात प्रवेश केला आहे. त्‍यानंतर आता उपजिल्हाप्रमुख बप्‍पा दळवी यांच्यासह ४० पदाधिकाऱ्यांनी शिंदे गटात प्रवेश केला.

मुख्यमंत्र्यांच्या निवासस्थानी मुंबईत हा प्रवेश सोहळा झाला. आचारसंहिता लागत असल्याने मुख्यमंत्री बैठका घेण्यात व्यस्त असतानाच हे पदाधिकारी मुंबईत पक्षप्रवेशासाठी धडकल्याने मुख्यमंत्र्यांना त्‍यांच्यापर्यंत पोहोचायला उशीर झाला. याचे भांडवल करण्याचा प्रयत्‍न काहींनी केला, मात्र ते होऊ शकले नाही, अशी प्रतिक्रिया प्रवेश केलेल्या कार्यकर्त्यांनी दिली. प्रवेश करणाऱ्यांत बप्पा दळवींसह कैलास भोकरे, ग्रामपंचायत सदस्य मंदा भोकरे,अमोल पोटे, नागेश कुकलारे, रावसाहेब शिंदे, दादासाहेब कासार, तेजस्विनी पंडित, छाया जाधव, सुनंदा जाधव आदींचा समावेश होता.