जागा वाटपावरून खेचातानी होणारच. पण मविआ तुटणार नाही; आदित्य ठाकरे यांचा छ. संभाजीनगरात दावा

छत्रपती संभाजीनगर (सीएससीएन वृत्तसेवा) : आमची लढाई एकमेकांसाठी नाही. कुणी मुख्यमंत्रिपदासाठी लढत नाही. भाजपला हद्दपार करण्यासाठी आम्हाला सरकार बनवायचे आहे, असा दावा ठाकरे गटाचे युवासेना प्रमुख व आमदार आदित्य ठाकरे यांनी छत्रपती संभाजीनगरात केला.

पूरपरिस्थिती आणि पिकांच्या नुकसानीची पाहणी करण्यासाठी बुधवारी (४ सप्‍टेंबर) आदित्य ठाकरे यांच्यासह ठाकरे गटाचे नेते संजय राऊत छत्रपती संभाजीनगरला आले होते. चिकलठाणा विमानतळावर आदित्य ठाकरे यांनी पत्रकारांशी संवाद साधला. यावेळी ते म्हणाले, की जागा वाटपावरून खेचातानी होणारच. पण तुटणार नाही. खेचातानीतूनच कुणाची किती ताकद आहे, हे कळते, असे सांगून आदित्य ठाकरे म्हणाले, की भाजप महाराष्ट्र द्वेष्टा आहे. २५६ एकर मिठागाराची जागा अदानीला दिली जात आहे. मुंबई विकायला निघाले आहे.

शेतकऱ्यांचे नुकसान झाले आहे. सण येत आहेत. शेतकऱ्यांना मदत देणे गरजेचे आहे. पंचनामे होतील, पण मागच्याप्रमाणे कुठे ५ रुपये, कुठे ५० रुपयांचा चेक, असे होऊ नये, असे ते म्हणाले. तत्‍काळ पंचनामे करून शासनाने मदत द्यावी अन्यथा सरकारच्या विरोधात रस्त्यावर उतरून आंदोलन करावे लागेल, असा इशारा ठाकरे यांनी दिला. पैठण तालुक्‍यातील पाचोड येथील राजू शेठ, माणिक शेळके यांच्या पिकांची पाहणी ठाकरे यांनी केली. यावेळी आ. अंबादास दानवे, माजी खासदार चंद्रकांत खैरे उपस्थित होते.