खैरे-भुमरेंत जोरदार वादावादी!; खैरे म्हणाले, चूप बस; भुमरे म्हणाले ए बोलायचं नाही… श्री संस्थान गणपती महाआरतीवेळी नक्की काय ड्रामा घडला…

छत्रपती संभाजीनगर (दिव्या पुजारी : सीएससीएन वृत्तसेवा) : खासदार संदिपान भुमरे आणि माजी खासदार चंद्रकांत खैरे यांच्यात आज, ७ सप्‍टेंबरला जोरदार जुंपली. एकमेकांकडे हातवारे करत त्‍यांनी अरेरावीही केली. निमित्त ठरले ते स्वागत कुणाचे आधी करायचे… राजाबाजार येथील श्री संस्थान गणपती मंदिरात सकाळी हा प्रकार घडला. खैरेंकडे हातवारे करून भुमरे म्‍हणाले, की हा घरचा कार्यक्रम नाही.त्यावर खैरेंनी भुमरेंना चूप बस म्हटले. भुमरेंनीही मग ए बोलायचं नाही… असे प्रत्‍युत्तर दिले… दोघांतील हमरीतुमरीची राजकीय वर्तुळात जोरदार चर्चा सुरू झाली आहे.

नक्की काय घडलं?
राजाबाजार येथील श्री संस्थान गणपती शहराचे आराध्यदैवत आहे. मान्यवरांच्या हस्ते महाआरती होऊन गणेशोत्सवाला सुरुवात करण्यात आली. खासदार संदिपान भुमरे, माजी खासदार चंद्रकांत खैरे, मंत्री अतुल सावे, खासदार भागवत कराड, माजी महापौर नंदकुमार घोडेले आदींची उपस्थिती होती. या कार्यक्रमात उपस्थित मान्यवरांच्या स्वागताची वेळ आली तेव्हा सूत्रसंचालन करणाऱ्या माजी महापौर घोडेले यांनी खैरे यांचे नाव आधी घेतले. याचे कारण खैरे मंदिराचे संरक्षक असून, विश्वस्त मंडळाच्या यादीनुसार ज्‍येष्ठ आहेत. मात्र खैरे यांचे नाव आपल्या आधी घेतल्यामुळे भुमरे संतापले.

हा सार्वजनिक कार्यक्रम आहे. प्रोटोकॉल पाळा, असा दम त्‍यांनी घोडेलेंना भरला. ते ऐकून खैरेंनी घोडेलेंना सांगितले, की प्रोटॉकोल पाळत नाही असं म्हण. त्‍यामुळे भुमरे अधिकच चिडले. खैरेंकडे हातवारे करून हा घरचा कार्यक्रम नाही… असे ते सुनावत असतानाच खैरेंनी परत चूप बस म्‍हणत त्‍यांना डिवचले. त्‍यावर भुमरेंनीही मग ए बोलायचं नाही, असं सुनावत देवाच्या ठिकाणी असा पक्षपात करायचा नाही, असे घोडेलेंनाही दटावले. कार्यक्रमानंतर भुमरे म्हणाले, की खैरे अजूनही माजी खासदार झाल्याचे मान्य करत नाहीत. चिडचिड करत असतात. खैरे म्‍हणाले, की मी माजी झाल्याचे मान्य करणारच नाही. कारण मी कधीही परत आजी होऊ शकतो. हे भुमरेंना कळत नाही…