सिल्लोड, फुलंब्री, पैठणचे उपनगराध्यक्ष निवडले, विठ्ठल सपकाळ, जमीर पठाण, तुषार पाटील यांचा विजय

छत्रपती संभाजीनगर (मेट्रोपोलिस पोस्ट वृत्तसेवा) : सिल्लोडच्या उपनगराध्यक्षपदी शिंदे गटाचे विठ्ठल सपकाळ यांची निवड झाली असून, त्यांनी भाजपच्या रेखा गणेश भूमकर यांचा २३ मतांनी पराभव केला. फुलंब्रीच्या उपनगराध्यक्षपदी काँग्रेसच्या जमीर पठाण यांची निवड झाली. त्यांनी भाजपचे योगेश मिसाळ यांचा ७ मतांनी पराभव केला. पैठणच्या उपनगराध्यक्षपदी शिंदे गटाचे तुषार सूर्यभान पाटील यांची बिनविरोध निवड झाली.

सिल्लोडमध्ये नगराध्यक्ष अब्दुल समीर यांच्यासह नवीन २८ नगरसेवकांनी सोमवारी (१२ जानेवारी) सकाळी ११ ला विशेष सोहळ्यात पदग्रहण केले. आ. अब्दुल सत्तार यांची प्रमुख उपस्थिती होती. त्यानंतर उपनगराध्यक्ष व स्वीकृत सदस्य निवडण्यात आले. उपनगराध्यक्षपदासाठी हात उंचावून मतदान घेण्यात आले. शिंदे गटाच्या नंदकिशोर सहारे, सागर जाधव, शेख बाबर बागवान यांची स्वीकृत सदस्य म्हणून निवड करण्यात आली.

फुलंब्री नगरपंचायतीच्या सभागृहात नगराध्यक्ष राजेंद्र ठोंबरे यांच्या उपस्थितीत उपनगराध्यक्ष व स्वीकृत सदस्य निवडण्यात आले. त्यासाठी विशेष सभा घेण्यात आली. उपनगराध्यक्ष पदासाठी ३ अर्ज आले. भाजपकडून योगेश मिसाळ, तर महाविकास आघाडीच्या वतीने काँग्रेसचे जमीर पठाण व हिना मुद्दसौर पटेल यांनी अर्ज दाखल केले होते. हिना पटेल यांनी अर्ज मागे घेतला. हात उंचावून मतदान घेण्यात आले. यात पठाण यांना १२, तर योगेश मिसाळ यांना ५ मते मिळाली. महाविकास आघाडीत नगराध्यक्ष पद ठाकरे गटाकडे गेल्याने उपनगराध्यक्ष पद काँग्रेसच्या वाट्याला आले आहे. भाजपचे मनोज मुळे यांची स्वीकृत नगरसेवकपदी निवड झाली.
पैठण नगरपरिषदेच्या सभागृहात नगराध्यक्ष विद्या कावसानकर यांच्या अध्यक्षतेखाली विशेष सभा झाली. नगरपरिषदेवर शिंदे गटाची एकहाती सत्ता आहे. त्यामुळे उपनगराध्यक्षपदासाठी केवळ तुषार पाटील यांचाच अर्ज आला.