गंगापूरजवळ दोन दुचाकींची जोरदार धडक, वृद्धाचा मृत्‍यू, ३ जखमी

By City News Desk

On 07 Sep 2025

गंगापूरजवळ दोन दुचाकींची जोरदार धडक, वृद्धाचा मृत्‍यू, ३ जखमी

गंगापूर (गणेश म्‍हैसमाळे : मेट्रोपोलिस पोस्ट वृत्तसेवा) : दोन दुचाकींची धडक होऊन एका दुचाकीवरील ७० वर्षीय वृद्धाचा मृत्‍यू झाला, तर तिघे जखमी झाले. ही दुर्दैवी घटना शनिवारी (६ सप्टेंबर) सायंकाळी साडेचारला गंगापूर- छत्रपती संभाजीनगर रस्त्यावरील हॉटेल विराज गार्डनसमोर घडली. पोपट रायभान थोरे (वय ७०, रा. नवाबपूर, ता. गंगापूर) असे मृत्‍यू झालेल्याचे नाव आहे.

पोपट थोरे हे अख्तर सरदार पटेल (वय ५५, रा. गंगापूर) यांच्यासोबत मोटारसायकलीने (क्र. एमएच २० एझेड १५६९) भोयगावकडे मुलीला भेटण्यासाठी जात होते. त्याचवेळी प्रविण शोभाराम दुडवे (वय २०) व आसाराम बर्डे (वय २०) हे तरुण मध्यप्रदेश येथील परप्रांतीय मजूर असून सध्या भेंडाळा येथे राहतात. ते मोटारसायकलीने (क्र. एमपी ४६ झेडएफ ४१९६) गंगापूरकडे येत होते. दोन्ही दुचाकींची समोरासमोर धडक झाली.

जखमींना शुभम वाघमारे आणि अनिकेत मुळे यांनी तत्काळ रुग्णवाहिकेतून गंगापूरच्या उपजिल्हा रुग्णालयात आणले. डॉ. हर्षल धाबे यांनी तपासून पोपट थोरे यांना मृत घोषित केले. अख्तर पटेल यांची प्रकृती गंभीर असून, त्यांच्यावर प्रथमोपचार करून पुढील उपचारासाठी छत्रपती संभाजीनगर येथे हलविण्यात आले. प्रविण दुडवे आणि आसाराम बर्डे यांच्यावर गंगापूरमध्येच उपजिल्हा रुग्णालयात उपचार सुरू आहेत. घटनेची नोंद गंगापूर पोलिसांनी घेतली आहे. तपास सहायक पोलीस उपनिरीक्षक दिनकर थोरे करत आहेत.