कायगावला गणेशभक्‍तांच्या काळजाचा ठोका चुकला!; गोदापात्रात पडलेला कैलास असा वाचवला..., गंगापूर तालुक्‍यातील घटना, नक्की काय घडलं वाचा...

गंगापूर (गणेश म्हैसमाळे : मेट्रोपोलिस पोस्ट वृत्तसेवा) : गंगापूर तालुक्‍यात गणेश विसर्जनाचा आनंद ओसंडून वाहत असताना जुने कायगाव (ता. गंगापूर) येथील सर्वांच्याच हृदयाचा ठोका चुकवला होता. गणेश विसर्जन करत असताना ३० वर्षीय युवक गोदावरी नदीत पडला. सुदैवाने त्याला वाचविण्यात यश आले. ही घटना शनिवारी (६ सप्टेंबर) रात्री साडे नऊच्या सुमारास घडली.

कैलास पोपटराव खेडकर (रा. बुट्टेवाडगाव, ता. गंगापूर) या युवकाचे नाव आहे. जीवन रक्षक दलाच्या जवानांनी स्पीडबोटीतून तत्काळ घटनास्‍थळी येत अवघ्या काही सेकंदातच कैलासला पाण्याबाहेर काढल्याने तो बचावला. गोदावरी नदी पुलाच्या पूर्व आणि पश्चिम बाजूने मोठ्या उत्साहात गणेश विसर्जन सुरू होते. अहिल्यानगरकडून छत्रपती संभाजीनगरकडे जाणाऱ्या पुलाच्या दिशेने कैलास गणेश विसर्जन करत होता. दुभाजक समजून त्याने पलीकडे उडी घेतली, तसा ४५ फूट खोल वाहत्या पाण्यात धपकन पडला. ही बाब लक्षात आल्याने गणेशभक्‍तांनी आरडाओरड सुरू केली.

जीवनरक्षक दलाचे जवान तैनात असल्याने त्यांनी वेळीच स्पीड बोटींतून कैलासपर्यंत जात त्याला श्री रामेश्वर मंदिराजवळ नेऊन पोलिसांच्या ताब्यात दिले. तेव्हा सर्वांनी सुटकेचा निश्वास सोडला. जवानांच्या रुपात गणपती बाप्पा धावून आल्याची भावना सर्वांनी व्यक्‍त केली. गंगापूर नगर परिषद आपत्ती व्यवस्थापन प्रमुख गणेश ठुबे, दीपक वाढे, पत्रकार अलीम चाऊस, गुन्हे शाखेचे पोलीस अंमलदार महेश बिरुटे, मुबारक शेख, रवि खाजेकर, राकेश खाजेकर, किशोर जाधव, पवन खाजेकर, अरुण डुलगज, सचिन खाजेकर, सुधीर खाजेकर यांनी कैलासला जीवन दान देण्यात महत्त्वाची भूमिका बजावली. 
कसा पडला? : दोन जोड पुलांच्या मध्ये पाच फुटांची जागा आहे. कैलासला अंधारात पलीकडे जाण्यासाठी अंदाज आला नाही. त्याने दुभाजक समजून उडी घेतली तसा नदीत पडला.