संशयावरून वाळूज MIDC तील ओॲसिस चौकात पोलिसांनी ट्रक पकडला, समोर आला मोठाच घोळ!!

छत्रपती संभाजीनगर (मेट्रोपोलीस पोस्ट वृत्तपत्राच्या सौजन्याने) : पुण्याहून भंगार जालन्याला नेणारा ट्रक वाळूज एमआयडीसीतील ओॲसिस चौकात पोलिसांनी पकडला. या भंगाराची कागदपत्रे नसल्याने ते चोरीचे असल्याची शक्यता निर्माण झाली आहे. पोलिसांनी ट्रक आणि भंगार (एकूण किंमत ७ लाख १२ हजार रुपये) जप्त केले. ही कारवाई गुरुवारी (४ सप्‍टेंबर) पहाटे एकला करण्यात आली.

भिमराव उत्तमराव चेपटे (वय ४९, रा. तातेवाडी ता.जि. जालना) असे संशयित ट्रकचालकाचे नाव आहे. पोलीस उपनिरीक्षक विनोद अबुज यांच्या पथकात पोलीस अंमलदार संदीप तागड, पैठणकर, भदर्गे, ठोके, पठारे आहेत. हे पथक गस्त घालत असताना  अबुज यांना गुप्त बातमीदारामार्फत कळले, की एक टाटा ट्रक संशयित भंगार घेऊन जात आहे. पथक लगेचच ओआयसीसी चौकात सापळा लावून थांबले. गुरुवारी (४ सप्‍टेंबर) पहाटे एकला संशयित ट्रक (एमएच १२ केपी ९६९५) येताना दिसला. पोलिसांनी ट्रक चालकाला हात देऊन थांबायला सांगितले. चालकाने ट्रक थांबवला. पोलीस उपनिरीक्षक अबुज यांनी चालकाला ट्रकमध्ये असलेल्या भंगार मालासंदर्भात चौकशी केली.

त्याने लोखंडी भंगारासंदर्भात कोणतीही कागदपत्र नसल्याचे सांगितले. भंगार कोठे खरेदी केले, कोठे विक्री करणार आहे याबाबत चौकशी केली असता त्याने लोखंडी भंगार साहित्य पुणे येथून घेत जालना येथे जात असल्याचे सांगितले. त्याच्याकडे ट्रकचीही कागदपत्रे नव्हती. पोलिसांनी ५ लाखांचा ट्रक, २ लाख १२ हजार रुपयांचे ७ हजार ७० किलो लोखंडी भंगार जप्त केले. ट्रकचालक भिमराव चेपटे याने भंगार साहित्य पुणे येथून कोठून तरी चोरून किंवा लबाडीने आणल्याचा संशय आल्याने पोलिसांनी त्‍याच्याविरुद्ध पोलीस अंमलदार संदीप तागड यांच्या तक्रारीवरून गुन्हा दाखल करून तपास सुरू केला आहे. अधिक तपास पोलीस अंमलदार सुरेश तारव करत आहेत.