गणेश विसर्जनाच्या आनंदावर विरजण पाडण्याचा कट रचणाऱ्या तिघांवर मुकुंदवाडी पोलिसांची कारवाई ; देशी दारूचा मोठा साठा जप्त

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : गणेश विसर्जनाच्या आनंदावर विरजण पाडण्याचा कट रचणाऱ्या तिघांवर मुकुंदवाडी पोलिसांच्या विशेष पथकाने कारवाई केली. देशी दारूच्या बाटल्यांची अवैध विक्री करण्याच्या प्रयत्‍नातील दोघांना दारूसाठ्यासह पकडले असून, एका दारू पुरवणाऱ्यावरही गुन्हा दाखल केला आहे. एकूण १ लाख १४ हजार रुपयांचा मुद्देमाल जप्त करण्यात आला आहे. ही कारवाई शनिवारी (६ सप्‍टेंबर) करण्यात आली.

नीलेश राजू डोंगरे (वय ३०, रा. संजयनगर, मुकुंवाडी), सौरब संजय मुळे (वय २९, रा. विजयनगर चौक, गारखेडा परिसर), त्याचा मालक विनोद महातोले (रा. उस्मानपुरा) अशी गुन्हा दाखल केलेल्यांची नावे आहेत. ही कारवाई विशेष पथकातील पोलीस उपनिरीक्षक शिवाजी घोरपडे यांच्यासह पोलीस अंमलदार विकास गुरुखेल, संतोष बिरारे, सुजल शर्मा, रवींद्र बेंडे, शैलेंद्र अडियाल यांनी केली. विशेष पथकाला गोपनीय माहिती मिळाली, की नीलेश डोंगरे हा संजयनगरात राहत्‍या घराजवळ व बाहेरील रस्‍त्‍यावर लाल स्कुटीवरून दारू घेऊन विकणार आहे. पोलिसांनी लगेचच संजयनगरातील गल्ली नं. १५ मध्ये जाऊन नीलेशला पकडले. त्‍याच्या देशी दारू बाटल्यांचे दोन बॉक्स मिळून आले. यातील एका बॉक्समध्ये ७ हजार ६८० रुपयांच्या ९६ बाटल्या, तर दुसऱ्या बॉक्समध्ये ८ हजार रुपयांच्या २०० बाटल्या मिळून आल्या. त्‍याच्याकडील ८० हजारांची स्कुटीही पोलिसांनी जप्त केली. त्‍याच्याविरुद्ध पोलीस अंमलदार सुजल शर्मा यांच्या तक्रारीवरून गुन्हा दाखल करण्यात आला आहे.

दुसऱ्या कारवाईत, विशेष पथकाला सौरब मुळे हा संजयनगरात दारू विकण्यासाठी येणार असल्याची माहिती मिळाली होती. पथकाने दुपारी सव्वा दोनला त्‍याला पकडले. त्‍याच्याकडील गोणी आणि दुचाकी जप्त केली. त्‍याच्या गोणीत ४८ देशी दारूच्या बाटल्या मिळून आल्या. चौकशीत सौरबने सांगितले, की तो विनोद महातोले याच्यासाठी काम करतो. दारूचा माल त्याचाच आहे. पोलिसांनी त्‍याला ताब्‍यात घेऊन दुचाकीसह एकूण १८ हजार ८४० रुपयांचा मुद्देमाल जप्त केला. पोलीस अंमलदार विकास गुरुखेल यांच्या तक्रारीवरून सौरबसह महातोलेविरुद्ध गुन्हा दाखल करण्यात आला आहे.