सिल्लोड (मेट्रोपोलिस पोस्ट वृत्तसेवा) : सिल्लोड नगराध्यक्षपदासाठी आ. अब्दुल सत्तार यांनी आपल्या पुत्राला पुन्हा नगराध्यक्ष बनविण्याचा चंग बांधला असला तरी, त्यांच्या वाटेत मात्र अनेक काटे असल्याचे समोर येत आहे. ज्यांच्याशी पक्षीय युती आहे, त्या भाजपचे स्थानिक पदाधिकारी सत्तारांविरुद्ध आहेत. पुन्हा पुत्रालाच नगराध्यक्ष करायचे ठरवल्याने घराणेशाहीमुळे पक्षातील पदाधिकारीही काहीसे नाराज आहेत. आता ठाकरे गटही सत्तारांविरुद्ध अधिकची मेहनत घेणार असल्याचे समोर येत आहे. माजी खासदार चंद्रकांत खैरे यांनी सिल्लोडमध्ये बैठक घेऊन सत्तारांविरुद्ध रणशिंग फुंकले. त्यामुळे सत्तारांना चोहोबाजूंनी घेरण्याचे प्रयत्न सुरू असल्याचे दिसून येत आहे.
मंगळवारी (११ नोव्हेंबर) दुपारी १२ ला खैरे यांनी सिल्लोड शहर, तालुक्यातील पदाधिकारी, कार्यकर्त्यांची बैठक घेऊन सत्तारांवर टीकास्त्र सोडले. या निवडणुकीत मतदार त्यांना त्यांची जागा दाखवून देतील, असे खैरे म्हणाले. बैठकीला उपजिल्हाप्रमुख विठ्ठल बदर, पद्माकर इंगळे, विधानसभा संघटक रघुनाथ चव्हाण, तालुकाप्रमुख रघुनाथ घरमोडे, संजय कळात्रे, शहर प्रमुख मच्छिंद्र घाडगे, सुनीता अवलवार, संपर्कप्रमुख सुनीता देव, राजू इंगळे, उपजिल्हाप्रमुख अविनाश कुमावत, सोपान बांगर आदींची उपस्थिती होती.
भाजपची रणनिती काय असेल?स्थानिक भाजप पूर्णपणे सत्तारांविरोधात आहे. विधानसभा निवडणुकीत भाजप पदाधिकाऱ्यांची रणनिती काहीशी हुकली. त्यामुळे अवघ्या काही मतांच्या फरकाने अब्दुल सत्तार निवडून आले. नगराध्यक्षपदासाठी आ. सत्तारांनी आता पुत्रालाच उभे केल्याने काहीही करून सत्तारांच्या ताब्यात सिल्लोड नगरपालिका जाऊ द्यायची नाही, असा चंग भाजप पदाधिकाऱ्यांनी बांधला आहे. भाजप पदाधिकारी सत्तारांविरुद्ध इतके टोकाला जाण्याचे कारणही तसेच आहे. जालना लोकसभा निवडणुकीत रावसाहेब दानवे यांचा बिस्मिल्ला केल्यामुळे आधीच सत्तारांविरुद्ध राहिलेले भाजप पदाधिकारी अधिकच आक्रमकपणे सत्तारांविरुद्ध विधानसभा निवडणुकीत राहिले, आता त्याचा पुढचा अंक नगरपालिका निवडणुकीत दिसून येत आहे.
ही इतकी टोकाची लढाई आहे, की विधानसभा निवडणुकीत सत्तारांविरुद्ध सक्षम उमेदवार राहावा, यासाठी भाजपमधून सुरेश बनकर ठाकरे गटात गेले आणि उमेदवारी मिळवून सत्तारांविरुद्ध दंड थोपटले. त्यांना अवघ्या भाजप पदाधिकाऱ्यांनी पाठिंबा देत त्यांचे कामही केले. म्हणजे उमेदवार ठाकरे गटाचा पण त्यांना विजयी करण्यासाठी भाजपची स्थानिक यंत्रणा काम करत होती. आता युती असली तरी नगरपालिका निवडणुकीत भाजपला शिंदे गट सोबत घेणार नाही, स्वतंत्र लढणार, असे आ. सत्तार यांनी जाहीर करून टाकले आहे. ही बाब भाजपच्या पथ्यावर पडणार आहे. आपले स्वतंत्र उमेदवार भाजपला उभे करता येणार आहेत.
ऐन निवडणुकीत कोर्टाच्या आदेशाने वाढवली अडचण
आ. अब्दुल सत्तार यांनी आमदार निधीमधून प्रत्येकी १६ लाख रुपयांच्या एक अशा दोन रुग्णवाहिका खरेदी करून स्वतःच्या प्रगती शिक्षण संस्थेला दिल्या, असा आरोप आहे. तशा फौजदारी अर्जाच्या अनुषंगाने सिल्ल्लोड येथील प्रथम वर्ग न्याय दंडाधिकारी के. टी. अधायके यांनी सिल्लोड शहर पोलिसांना अहवाल सादर करण्याचे आदेश दिले आहेत. त्यामुळे या निवडणुकीत हाही मुद्दा चर्चेत राहणार आहे.
.jpg)
.jpg)
