"छत्रपती संभाजीनगर सिटी न्यूज' वेबसाईटवर प्रसिद्ध होणारा मजकूर, छायाचित्रे 'मेट्रोपोलिस पोस्ट' वृत्तपत्राच्या परवानगीशिवाय पूर्णतः किंवा अंशतः कॉपी करण्यास सक्त मनाई आहे. असे करताना कुणीही आढळल्यास कोणतीही वेगळी नोटीस न देता कायदेशीर कारवाई केली जाईल याची नोंद घ्यावी. - संपादक, मेट्रोपोलिस पोस्ट वृत्तपत्र
छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : राज्यात ९६ लाख बोगस मतदार असल्याचा राग महाराष्ट्र नवनिर्माण सेनेचे अध्यक्ष राज ठाकरे यांनी आळवला असतानाच आता सत्ताधारी राष्ट्रवादी काँग्रेस पक्षानेही (अजित पवार गट) राज यांच्या सुरात सूर मिसळला आहे. गंगापूर तालुक्याच्या मतदार यादीत तब्बल ३६ हजार मतदारांची नावे दोन किंवा अधिक वेळा असल्याचा आरोप राष्ट्रवादी काँग्रेसचे आमदार सतीश चव्हाण यांनी केला असून, ही नावे न वगळल्यास न्यायालयात जाण्याचा इशाराही त्यांनी जिल्हा प्रशासनाला दिला आहे.
गंगापूर तालुक्यात अनेक मतदारांची नावे दोन किंवा त्यापेक्षा अधिक वेळा मतदार यादीत दिसत असून, याला बीएलओ जबाबदार असल्याचा आरोप आमदार चव्हाण यांनी केला. ते म्हणाले, की तालुक्यातील रांजणगाव शेणपुंजी येथे एक दोन नव्हे तर तब्बल दहा बोगस दत्तनगर आहेत. मतदारांचा पत्ता दत्तनगर दिसत असला तरी प्रत्यक्षात मतदार तिथे राहतच नाहीत. अनेक मतदारांची नावे दोन प्रभागांत आहेत. काहींची नावे ते राहत असलेला प्रभाग सोडून इतर प्रभागात दाखविण्यात आली आहेत.
मृत, स्थलांतर झालेल्यांची नावे अजूनही मतदार यादीत आहेत. अनेक मतदारांचा पत्ता एकच आहे. अनेकांच्या पत्त्यावर घर नंबर नाही. घर नंबर चुकीचे, घरांची नावे काल्पनिक असे प्रकारही यादी पाहिल्यावर दिसून येतात. ही केवळ गंगापूर तालुक्याची नव्हे तर जिल्हाभराची परिस्थिती आहे, असेही आमदार चव्हाण यांनी पत्रकार परिषदेत सांगितले. या वेळी पक्षाच्या जिल्हा महिला आघाडी अध्यक्ष स्वाती कोल्हे, गंगापूर तालुकाध्यक्ष संजय जाधव, अनुराग शिंदे, सुभाष सोनवणे, योगिता महालकर आदींची उपस्थित होते.
.jpg)
.jpg)
.jpg)
.jpg)
.jpg)
.jpg)
