खुलताबादमध्ये गोची : ओबीसी महिलांसाठी एकही गण नाही, पण सभापती पद मात्र याच प्रवर्गासाठी राखीव!

खुलताबाद (मेट्रोपोलिस पोस्ट वृत्तपत्राच्या सौजन्याने) : खुलताबाद तालुक्यात इतर मागासवर्ग प्रवर्गातील (ओबीसी) महिलांसाठी एकही गण आरक्षित नसला तरी पंचायत समितीचे सभापतीपद मात्र याच प्रवर्गातील महिलांसाठी राखीव झाल्याने सगळ्यांचीच गोची झाली आहे. शिवाय, या आरक्षण घोळामुळे पंचायत समितीच्या सभापती पदावर डोळा ठेवून असलेल्या तालुक्यातील राजकीय मंडळींचा संभ्रम देखील वाढला आहे.

खुलताबाद तालुक्यात पंचायत समितीचे सहा गण आहेत. यापैकी गल्लेबोरगाव, गदाना व ताजनापुर हे तीन गण सर्वसाधारण गटातील महिलांसाठी आरक्षित झाले आहेत. इतर तीनपैकी वेरूळ गण अनुसूचित जाती, बाजार सावंगी गण इतर मागासवर्ग प्रवर्गासाठी तर टाकळी राजेराय गण सर्वसाधारणसाठी आरक्षित आहे. त्यातच गुरुवारी या पंचायत समितीच्या सभापती पदाचे आरक्षण जाहीर झाले. त्यात हे पद इतर मागासवर्ग प्रवर्गातील महिलांसाठी आरक्षित झाले. तालुक्यातील पंचायत समितीच्या सहापैकी एकही गण इतर मागासवर्ग प्रवर्गातील महिलांसाठी राखीव नसला तरी सभापतीपद मात्र याच प्रवर्गासाठी राखीव झाल्याने हे आरक्षण कसे काढण्यात आले, असा प्रश्न तालुक्यातील राजकीय मंडळींच्या वर्तुळासह सोशल मीडियावरही चर्चेचा विषय ठरला आहे.

दुसरीकडे बाजार सावंगी गण ओबीसीसाठी आरक्षित असल्याने या गणातून एखादी महिला निवडून आल्यास तिला सभापतीपदाची संधी मिळू शकते, अशी चर्चा सुरू झाली आहे. सोबतच ओबीसीचे प्रमाणपत्र असलेली महिला सर्वसाधारण प्रवर्गासाठी आरक्षित गटातून विजयी झाल्यास तिला सभापतीपदाची खुर्ची मिळू शकते, अशीही चर्चा सुरू आहे. पंचायत समिती सभापती पदासाठी निश्चित झालेल्या झालेल्या आरक्षणामुळे प्रशासन देखील संभ्रमात पडले आहे. मात्र, निवडणूक विभागाचे नायब तहसीलदार अविनाश निळेकर यांनी सांगितले की, तालुक्यात ओबीसी महिलांसाठी एकही गण सुटलेला नसला तरी या प्रवर्गाची महिला कोणत्याही गणातून निवडून आली तरी तिला पंचायत समितीचे सभापतीपद मिळू शकते.

अर्थात त्या विजयी उमेदवाराकडे जात पडताळणी प्रमाणपत्र असणे बंधनकारक राहील. पंचायत समितीचे सभापतीपद ओबीसी महिलांसाठी सुटल्याने शिवसेनेच्या उद्धव ठाकरे गटाचे तालुकाप्रमुख राजू वरकड मात्र खुश झाले आहेत. वरकड यांची मुलगी ऋतुजा हिच्याकडे ओबीसीचे प्रमाणपत्र असल्याने तिला सर्वसाधारण गटातून निवडणूक रिंगणात उतरवून निवडून आणण्याची रणनीती वरकड यांनी आखली आहे. ऋतुजा वरकड निवडून आल्यावर सभापतीपदावर दावा ठोकण्याचा वरकड यांचा मानस आहे.