वैजापूर (मेट्रोपोलिस पोस्ट वृत्तसेवा) : शेताच्या कडेला लिंबाच्या झाडाला बांधलेल्या झोक्यातून ३ वर्षीय चिमुकला गायब झाला आहे. त्याला कुणीतरी पळवल्याची शक्यता असून, त्याच्या आईने विरगाव पोलीस ठाण्यात अपहरणाची तक्रार दिली आहे. त्यावरून पोलिसांनी चिमुकल्याचा शोध सुरू केला आहे. ही घटना सोमवारी (१३ ऑक्टोबर) दुपारी ३ च्या सुमारास वैजापूर तालुक्यातील शिरसगाव शिवारात घडली.
रंगिता काशिराम खरते (वय ३०, रा. बुर्ली ता. बडवाणी जि. सेंदवा राज्य मध्यप्रदेश हल्ली मुक्काम रंगनाथ परभत वाघ यांच्या शेतवस्तीवर शिरसगाव शिवार ता. वैजापूर) यांनी या प्रकरणात तक्रार दिली आहे. त्या पती, दोन मुले राजन व साजन यांच्यासह राहतात. काशिराम व रंगिता हे दाम्पत्य मोलमजुरी करून कुटुंबाचा उदरनिर्वाह करते. सोमवारी (१३ ऑक्टोबर) सकाळी ९ च्या सुमारास रंगिता या मुलगा चिमुकल्या साजनसह सासू बालाबाईसोबत शिरसगाव येथील रंगनाथ वाघ यांच्या कपाशीच्या शेतात कापूस वेचणीसाठी आली होती.
दुपारी ३ च्या सुमारास चिमुकला साजन हा शेताच्या कडेला लिंबाच्या झाडाला बांधलेल्या झोक्यावर खेळत होता. सायंकाळी ६ च्या सुमारास साजनचा आवाज येत नसल्याने रंगिता यांनी जाऊन पाहिले असता तो तिथे नव्हता. त्यामुळे घाबरलेल्या रंगिता यांनी शेतमालकासोबत मिळून साजनचा आजूबाजूला शोध घेतला. मात्र तरीही तो मिळून आला नाही. त्याला कुणीतरी पळवून नेल्याची शक्यता रंगिता यांनी व्यक्त करत पोलिसांत तक्रार दिली. त्यावरून पोलिसांनी अपहरणकर्त्याविरुद्ध गुन्हा दाखल करून चिमुकल्याचा शोध सुरू केला आहे. तपास पोलीस निरीक्षक शंकर वाघमोडे करत आहेत.
खुलताबाद तालुक्यातून १४ वर्षीय मुलीचे अपहरणखांडीपिंपळगाव (ता. खुलताबाद) येथून १४ वर्षीय मुलीचे अपहरण करण्यात आल्याची घटना समोर आली आहे. खुलताबाद पोलिसांनी अज्ञात अपहरणकर्त्याविरुद्ध मंगळवारी (१४ ऑक्टोबर) गुन्हा दाखल करून मुलीचा शोध सुरू केला आहे. मुलगी मजुरी करणाऱ्या कुटुंबातील असून, ११ वीत शिकत होती. मंगळवारी पहाटे पाचला मुलगी घरात झोपलेली दिसली नाही. त्यामुळे तिच्या आई-वडिलांनी शोध सुरू केला. मात्र ती मिळून आली नाही. अखेर खुलताबाद पोलिसांत वडिलांनी तक्रार दिली. तिला कुणीतरी फूस लावून पळवून नेल्याचे तक्रारीत म्हटले आहे. अधिक तपास पोलीस निरीक्षक धनंजय फराटे करत आहेत.
