छ. संभाजीनगरात अतिवृष्टीचा आणखी एक बळी : कोबीचे पीक पाण्याखाली गेल्याने शेतकऱ्याने शेतातच घेतला गळफास!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने ) : अतिवृष्टीचा आणखी एक बळी छत्रपती संभाजीनगर जिल्ह्यात गेला आहे. त्यांच्या शेतातील पिकात पाणी साचले आहे. कोबीचे पीक काढणीला आले असताना हे संकट ओढावल्याने शेतकरी हादरून गेला. त्यांच्या मुलाचे एमबीबीएसचे शिक्षण सुरू आहे. त्याची फीस कशी भरावी, अशी चिंता त्यांना लागली आणि त्यांनी गळफास घेऊन आत्महत्या केली. ही दुर्दैवी आणि शासन-प्रशासनाच्या डोळ्यांत अंजन घालणारी घटना मंगळवारी (३० सप्टेंबर) पहाटे बकापूर- पळशी (ता. छत्रपती संभाजीनगर) येथे समोर आली.

मधुकर सर्जेराव पळसकर (रा. ५४, रा. बकापूर ) असे आत्महत्या केलेल्या शेतकऱ्याचे नाव आहे. छत्रपती संभाजीनगर शहरापासून जवळच असल्याने पळसकर हे भाजीपाल्याचे पीक घेत होते. सध्या त्यांच्या शेतातील कोबीचे पीक काढायला आले होते. त्यातच गेल्या काही दिवसांत झालेल्या अतिवृष्टीमुळे शेतात पाणी साचले. त्यांचा मुलगा हैदराबाद येथे एमबीबीएसचे शिक्षण घेतो. पळसकर यांच्यावर एका राष्ट्रीयीकृत बँकेचे कर्ज आहे. हे कर्ज फेडण्याची चिंता, त्यात मुलाची एमबीबीएसची फीस कशी भरायची, या चिंतेने त्यांना घेरले.

त्यांनी शेतातील लिंबाच्या झाडाला मध्यरात्री गळफास घेतला. ही बाब मंगळवारी पहाटे समोर आली. त्यांच्या पश्चात पत्नी, तीन विवाहित मुली आणि मुलगा असा परिवार आहे. यापूर्वी अतिवृष्टीमुळे कपाशीचे पीक वाया गेल्याने कायगाव (ता. गंगापूर) येथील बाबासाहेब लक्ष्मण वायसळ (वय ४८) या शेतकऱ्याने गळफास घेऊन राहत्‍या घरात आत्‍महत्‍या केल्याची घटना शुक्रवारी (६ सप्‍टेंबर) घडली होती. जिल्ह्यात अतिवृष्टीचा हा दुसरा बळी गेला असून, शासन-प्रशासनाकडून तातडीने शेतकऱ्यांना आर्थिक मदत करून दिलासा देण्याची मागणी होत आहे.