पैठण (मेट्रोपोलिस पोस्ट वृत्तसेवा) : पैठणमध्ये चालू महिन्यातच खून झाल्याच्या शक्यतेचा दुसरा मृतदेह आढळल्याने खळबळ उडाली आहे. आता आढळलेला मृतदेह अर्धा असून, डोके व छाती गायब आहे. सोमवारी (२२ डिसेंबर) सायंकाळी पाचच्या सुमारास शहरापासून तीन किलोमीटरवर गोदावरी नदीच्या कडेला हा मृतदेह आढळला.
पोलीस मृतदेहाची ओळख पटविण्याचा प्रयत्न करत आहेत. गोदावरी नदीत काहीजण मासेमारी करत असताना त्यांना हा अर्धवट मृतदेह दिसला. मृतदेह तरुणाचा असण्याची शक्यता आहे. बऱ्याच दिवसांपूर्वी त्याला या ठिकाणी आणून टाकल्याचे प्रथमदर्शनी दिसून येते. अंगातील पँटचा रंगही कळत नाही, अशी अवस्था मृतदेहाची आहे. पैठण पोलिसांना कळताच पोलीस निरीक्षक महादेव गोमारे यांनी घटनास्थळी धाव घेतली. पंचनामा केल्यानंतर मृतदेह पैठण येथील शासकीय रुग्णालयात आणण्यात आला.
खून झाल्याची दाट शक्यता आहे. हा मृतदेह कुणाचा, त्याला कुणी आणि कशासाठी मारले, असे अनेक प्रश्न निर्माण झाले आहेत. चालू महिन्यातच गेल्या आठवड्यात पैठण तालुक्यातील पाटेगाव येथील गोदावरी पुलाखाली कृष्णा पंढरीनाथ धनवडे (वय ३०, रा. गदेवाडी, ता. शेवगाव, जि. अहिल्यानगर) याचा गोणीत भरलेला मृतदेह आढळला होता. सागर रामेश्वर केसापुरे (वय २०, रा. देऊळगाव राजा), ऋषिकेश सखाराम गायकवाड (वय २२, रा. दुधड, ता. जि. छत्रपती संभाजीनगर) आणि एक विधीसंघर्ष बालकाने हा खून करून मृतदेह आणून टाकल्याचे समोर आले होते. त्यानंतर आणखी एक खुनाच्या शक्यतेचा मृतदेह आढळल्याने खळबळ उडाली आहे.
सिल्लोडमध्ये आढळला महिलेचा मृतदेह...सिल्लोड तालुक्यातील पिंपळगाव पेठ येथे पुलाखालील पाण्यात चंद्रकलाबाई रामदास साळवे (वय ६५, रा. यशवंतनगर, सिल्लोड) यांचा मृतदेह मिळून आला. ही घटना सोमवारी (२२ डिसेंबर) दुपारी १२ च्या सुमारास समोर आली. याबाबत दुपारी २ वाजता सिल्लोड ग्रामीण पोलिसांनी आकस्मिक मृत्यूची नोंद केली आहे. त्यांच्या नातेवाइकांनी मृतावस्थेत चंद्रकलाबाईंना सिल्लोडच्या उपजिल्हा रुग्णालयात आणले होते. वैद्यकीय अधिकाऱ्यांनी तपासणी करून त्याला मृत घोषित केले. मृत्यूचे नेमके कारण अद्याप समोर आलेले नाही.
