सिल्लोडची मर्डर केस : ९० एकर शेती, भुसार मालाचे मोठे व्यापारी, घरी ट्रॅक्टर, कार... खंडणी न मिळल्याने अपहरणकर्त्यांनी केली हत्‍या, ५ मारेकऱ्यांची नावे आली समोर...

सिल्लोड (मेट्रोपोलिस पोस्ट वृत्तसेवा) : बोदवड (ता. सिल्लोड) येथील व्यापारी तुकाराम माधवराव गव्हाणे (वय ५५) यांच्या अपहरण नाट्याचा शेवट रक्तरंजीत झाला आहे. अपहरणकर्त्यांनी त्यांना मारून चाळीसगाव घाटात मृतदेह फेकून दिला. अपहरणकर्त्या ५ जणांना अटक केल्यानंतर हा धक्कादायक प्रकार आज, २९ डिसेंबरला पहाटे समोर आला. सिल्लोड तालुक्यातील उंडणगाव- बोदवड रस्त्यावरून गव्हाण यांचे अपहरण झाले होते. अपहरणकर्त्यांनी गव्हाणे यांच्या मुलाला तब्बल एक कोटी रुपयांची खंडणी मागितली होती.

सचिन नारायण बनकर (वय २५, रा. गोळेगाव ता. सिल्लोड), अजिनाथ उर्फ अजय रखमाजी सपकाळ (वय २२, रा. पालोद), वैभव समाधान रानगोते (वय २३, रा. गोळेगाव), विशाल साहेबराव खरात (वय २३, रा. पानवडोद) व दीपक कन्हैयालाल जाधव (वय २५, रा. लिहाखेडी) अशी पकडण्यात आलेल्या संशयितांची नावे असल्याची माहिती अजिंठा पोलीस ठाण्याचे पोलीस निरीक्षक अमोल ढाकणे यांनी दिली. गव्हाणे यांच्याकडे जवळपास ९० एकर शेती असून, ते भुसार मालाचे मोठे व्यापारी होते. त्यांचे बोदवडला कृषी सेवा केंद्रही आहे. त्यांच्याकडे ट्रॅक्टर, कार, दुचाकी आहे. उंडणगावहून एक लाख रुपये घेऊन येत असल्याचे पाहून अपहरणकर्त्यांनी डाव साधला. पाटील यांचे अपहरण करून एक कोटीची खंडणी मागितली.

खंडणी न मिळाल्याने खून केला. तुकाराम पाटील यांच्या पश्चात पत्नी, दोन मुले, एक मुलगी असा परिवार आहे. पोलीस सूत्रांच्या माहितीनुसार, व्यापाऱ्यांकडून मकाचे पैसे आणण्यासाठी शनिवारी (२७ डिसेंबर) सायंकाळी पाचला उंडणगावला गेले होते. त्यांनी व्यापाऱ्यांकडून पैसे घेतले आणि रात्री ८ ला दुचाकीने (क्र. एमएच २० जीएफ ०४४३) घरी परतत असताना रस्त्यातच त्यांचे चाकूचा धाक दाखवून अपहरण झाले. रात्री उशिरापर्यंत ते घरी न आल्याने मुलाने शोधाशोध सुरू केली. अखेर रात्री उशिरा अजिंठा पोलीस ठाण्यात वडील बेपत्ता झाल्याची तक्रार दिली होती. त्यानंतर मध्यरात्री १२ ला तुकाराम गव्हाणे यांच्या मोबाइलवरून कॉल आला. त्यावर अपहरणकर्ते बोलत होते. त्यांनी ‘तुझ्या वडिलांचे आम्ही अपहरण केले असून, तू आम्ही सांगू तेथे एक कोटी रुपये घेऊन ये, अशी धमकी दिली. त्यामुळे मुलगा घाबरून गेला. त्यानंतर काही वेळातच पुन्हा त्याच्या काकांना फोन करून दोन कोटींची मागणी अपहरणकर्त्यांनी केली. त्यांची मागणी वाढतच चालल्याने कुटुंबीयांनी ही बाब पोलिसांना कळवली. त्यानंतर अजिंठा पोलीस ठाण्याचे सहायक पोलीस निरीक्षक अमोल ढाकणे, पोलीस उपनिरीक्षक धम्मदीप काकडे यांच्यासह वडोदबाजार पोलीस आणि गुन्हे शाखेच्या तीन पथकांनी तपास सुरू केला. सीसीटीव्ही फुटेज आणि मोबाईल लोकेशनच्या मदतीने शोध घेण्यात येत होता. आज पहाटे चाळीसगाव घाटात त्यांचा मृतदेह पोलिसांना मिळून आला. 

अशी केली हत्या...
पैसे मिळण्यास उशीर होत असल्याने मारेकऱ्यांनी गव्हाणे यांना चाळीसगाव घाटातील म्हसोबा मंदिराजवळ नेत बेदम मारहाण केली. यात त्यांचा मृत्यू झाला. नंतर त्यांचे हातपाय बांधून चाळीसगाव घाटात फेकून दिले. मारेकऱ्यांकडूक एक छर्ऱ्याचे पिस्तूल व चाकू जप्त करण्यात आला आहे. सोमवारी त्यांना न्यायालयात हजर केले असता न्यायालयाने ४ दिवसांची पोलीस कोठडी सुनावली.

असे पकडले मारेकरी...
पोलिसांनी अपहरणकर्त्यांचे लोकेशन ट्रेस केले. ते छत्रपती संभाजीनगर शहरातील बसस्थानक, बाबा पेट्रोलपंप, टीव्ही सेंटर असे बदलत गेले. रविवारी रात्री ९ ला अपहरणकर्त्यांनी आम्हाला पैसे नकोत सांगत फोन बंद केला. त्यावेळी त्यांचे लोकेशन समृद्धी महामार्गावर टोलनाक्याजवळ दिसले. पोलिसांनी त्यांची कार अडवली आणि चौघांना ताब्यात घेतले. पाचवा संशयित दीपक जाधव हा त्यांना गावात राहून पोलिसांच्या हालचालींची माहिती देत होता. त्यामुळे त्यालाही अटक करण्यात आली.