रांजणगाव शेणपुंजीत पेंटरची आत्‍महत्‍या, वाहेगावमध्ये तरुण शेतकऱ्याचा गळफास

छत्रपती संभाजीनगर (सीएससीएन वृत्तसेवा) : दोन तरुणांनी गळफास घेऊन आत्‍महत्‍या केल्याची घटना वाळूज एमआयडीसी आणि गंगापूर तालुक्‍यातील वाहेगावमध्ये समोर आली आहे. रांजणगाव शेणपुंजीत पेंटरने राहत्‍या घरात तर वाहेगावमध्ये शेतकऱ्याने शेतात आंब्याच्या झाडाला गळफास घेतला.

वाळूज एमआयडीसीतील रांजणगाव शेणपुंजी येथे ३० वर्षीय शेख अजहर शेख मुनीर (मूळ रा. गुजराज) हा कुटुंबासह राहत होता. तो पेंटिंगचे काम करायचा. शनिवारी (१० ऑगस्ट) रात्री ११ च्या सुमारास घरच्यांना तो वरच्या मजल्यावरील रूममध्ये छताच्या सिलिंग फॅनला गळफास घेतलेल्या अवस्थेत दिसला. त्‍याला घाटी रुग्णालयात नेले असता डॉक्‍टरांनी तपासून मृत घोषित केले. या प्रकरणी वाळूज एमआयडीसी पोलिसांनी आकस्मात मृत्यूची नोंद केली आहे.

दुसऱ्या घटनेत गंगापूर तालुक्यातील वाहेगाव शिवारात सोमवारी (१२ ऑगस्ट) सकाळी सातच्या सुमारास आंब्याच्या झाडाला गळफास घेऊन योगेश सोमनाथ तगरे (वय २४) या शेतकऱ्याने आत्महत्या केल्याचे समोर आले. गट क्रमांक २६९ मध्ये तगरे कुटुंबीय वास्तव्यास असून योगेश हा वडील व भाऊ यांच्यासह शेती करायचा. तो रविवारी रात्री आठला जेवण करून झोपी गेला होता.

सोमवारी सकाळी काकाच्या मुलाला घराच्या बाजूला असलेल्या आंब्याच्या झाडाला योगेश दोरीच्या साह्याने गळफास घेतलेल्या अवस्थेत आढळला. त्याला गंगापूर येथील उपजिल्हा रुग्णालयात दाखल केले असता डॉक्टरांनी तपासून मृत घोषित केले. वाढत्‍या कर्जामुळे योगेश गेल्या काही दिवसांपासून चिंतित होता. यातूनच त्याने आत्महत्या केल्याची प्राथमिक माहिती समोर येत आहे. त्याच्या पश्चात आई-वडील, एक भाऊ, विवाहित बहीण, असा परिवार आहे.