बिडकीनजवळ दोन दुचाकींची समोरासमोर धडक; दोन पुरुषांचा मृत्‍यू, दोन महिला जखमी

पैठण (सीएससीएन वृत्तसेवा) : दोन दुचाकींची समोरासमोर धडक होऊन दोघे जागीच ठार, तर दोन महिला गंभीर जखमी झाल्या. ही घटना पैठण- छत्रपती संभाजीनगर रस्त्यावरील कवडगावजवळ शुक्रवारी (५ जुलै) दुपारी साडेचारच्या सुमारास घडली.

अशोक कडूबा भालेराव (वय ३६, रा. मिसारवाडी, छत्रपती संभाजीनगर), प्रा. नामदेव कारभारी डफळ (वय ३५, रा. रोहतवाडी, ता. पाटोदा, जि. बीड) अशी मृत्‍यू झालेल्यांची नावे आहेत. अनिता नामदेव डफाळ (वय २९), नंदाबाई लहू पाखरे (वय ५०, रा. गुंतेगाव, ता. गेवराई, जि. बीड) अशी गंभीर जखमींची नावे आहेत. अनिता छत्रपती संभाजीनगर येथील घाटी रुग्णालयात आरोग्यसेविका असून, प्रा. नामदेव डफळ पत्नीसह पैठणवरून संभाजीनगरकडे दुचाकीने येत होते. त्याचवेळी बिडकीनवरून अशोक भालेराव व नंदाबाई पाखरे दुचाकीने पैठणकडे जात होते.

दोन्ही दुचाकींची कवडगावजवळ धडक झाली. यात चौघेही गंभीर जखमी झाले. बिडकीन पोलिसांनी घटनास्‍थळी धावून जात जखमींना बिडकीन येथील ग्रामीण रुग्णालयात दाखल केले. डॉ. आशिष वेदपाठक यांनी अशोक व नामदेव यांना तपासून मृत घोषित केले, तर अनिता व नंदाबाई यांना छत्रपती संभाजीनगर येथील घाटी रुग्णालयात हलविण्यात आले. घटनेची नोंद बिडकीन पोलिसांनी घेतली आहे. अधिक तपास पोलीस निरीक्षक प्रमोद पाटील यांच्या मार्गदर्शनाखाली पोलीस उपनिरीक्षक अशोक माने करत आहेत.