अजब पाहुण्याची गजब करामत… चहा-पाणी झाल्यावर विवाहितेला बेडरूममध्ये चल म्हणत अश्लील चाळे!, गंगापूरमध्ये खळबळ

गंगापूर (सीएससीएन वृत्तसेवा) : गंगापूरमध्ये एका पाहुण्याने कमालच केली. चहा-पाणी झाल्यावर त्‍याने घरातील ३६ वर्षीय विवाहितेला बेडरूममध्ये चल म्‍हणत अश्लील चाळे सुरू केले. तिने आरडाओरड केल्याने तिची जाऊ व सासू धावत आली. नंतर त्‍यांनी तिच्या पतीला कळवले. पती आल्यावर गंगापूर पोलीस ठाण्यात तक्रार देण्यात आली. किरण दहातोंडे (रा. जामगाव रोड, गंगापूर) असे या करामती पाहुण्याचे नाव आहे. त्‍याच्याविरुद्ध गुन्हा दाखल करण्यात आला आहे.

या प्रकरणात गुरुवारी (२५ जुलै) गंगापूर शहरातील हनुमाननगर येथील ३६ वर्षीय विवाहितेने तक्रार दिली. २१ जुलैला सायंकाळी साडेसहाच्या सुमारास ती, तिची सासू व जाऊ घरी होते. तिचा पती व दीर कामानिमित्त बाहेर गेलेले होते. त्‍याचवेळी किरण दहातोंडे त्‍यांच्या घरी आला. तो म्हणाला, की मला चहा करा… त्‍यामुळे पीडित विवाहितेने जाऊला त्याच्यासाठी चहा करायला सांगितले. जाऊने चहा करून दिला. किरणने चहा पिल्यावर घराचे रूमबाबत विचारपूस करायला सुरुवात केली व घरात फिरू लागला. विवाहितेला विचारू लागला की ही बेडरूम कोणाची आहे, ती बेडरूम कोणाची आहे…विचारत असतानाच तिला अश्लील खानाखुणा करू लागला.

विवाहितेची जाऊ तिथून जाताच त्‍याने विवाहितेचा हात पकडला. विवाहितेने त्याचा हात झिडकारला असता तो म्हणाला, की तू मला आवडते. तू माझ्यासोबत बेडरूममध्ये चल… त्‍यानंतर त्‍याने तिच्यासोबत अश्लील चाळे सुरू केले. त्‍यामुळे विवाहिता घाबरून गेली व आरडाओरड सुरू केली. त्‍यामुळे जाऊ व सासू पळत आल्या. किरण तिथून पळाला व घराच्या किचनमध्ये गेला. सासू त्याच्यामागे गेली तेव्हा तो किचनमधून घराच्या बाहेर जाऊन पळून गेला. घरात तीनच महिला असल्याने त्‍या घाबरून गेल्या होत्या. विवाहितेने पतीला कॉल करून घडलेला प्रकार सांगितला. तिचा पती घरी आल्यानंतर या प्रकरणात पोलिसांत तक्रार देण्यात आली. त्‍यावरून पोलिसांनी किरण दहातोंडेविरुद्ध गुन्हा दाखल केला आहे. अधिक तपास पोलीस अंमलदार कमल शेळके करत आहेत.