अपार्टमेंट टेरेसवर बांधलेल्या अनधिकृत खोल्या पाडल्या!; जिन्सी भागात महापालिकेची कारवाई

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : स्टार हाइट्स अपार्टमेंटच्या टेरेसवर बांधलेल्या अनधिकृत दोन खोल्या आणि बाथरूम महापालिकेच्या पथकाने गुरुवारी (१६ ऑक्‍टोबर) पाडले. जिन्सी परिसरात ही कारवाई करण्यात आली.

अपार्टमेंटमध्ये एका फ्‍लॅटधारकाने टेरेसवर चक्क दहा बाय दहा फूट आकाराच्या दोन खोल्या आणि बाथरूम बांधले होते. या बांधकामाबद्दल ज्येष्ठ नागरिक नाहीद सुलताना यांनी महापालिकेकडे तक्रार केली. तक्रारीनुसार, बांधकाम करणारा व्यक्ती टेरेसचा इतरांना वापर करू देत नाही. टेरेस वापरण्याचा प्रयत्न केला तर शिवीगाळ केली. तक्रारीनंतर महापालिकेने कारवाईसाठी पथक पाठवले होते. त्यावेळी त्या व्यक्तीने मुलीचे लग्न असल्याने १० दिवसांची मुदत मागितली होती.

महापालिकेचे पथक माघारी फिरताच त्या व्यक्तीने याच विषयावरून न्यायालयात धाव घेतली. त्यानंतर महापालिकेने दोन वेळा नोटिसा बजावल्या. तरीही त्या व्यक्तीने दाद दिली नाही. अखेर महापालिकेच्या प्रशासनाने या नौटंकीबाज व्यक्तीला जास्त महत्त्व न देता थेट अपार्टमेंटवर पथक नेले आणि दोन्ही खोल्या व बाथरूमला पाडून टाकले. अशा पद्धतीने शहरात अन्य अपार्टमेंटमध्येही अनधिकृत बांधकामे केली आहेत का, याचा तपास महापालिकेने करावा आणि तीही अतिक्रमणे उद्‌ध्वस्त करावीत, अशी मागणी नागरिकांकडून होत आहे.