महसूल कर्मचाऱ्यांना आवश्यक सुविधा उपलब्ध करून देणार; पालकमंत्री अब्दुल सत्तार यांची ग्वाही, छ. संभाजीनगरात महसूल पंधरवड्याचा समारोप

छत्रपती संभाजीनगर (सीएससीएन वृत्तसेवा) : महसूल विभाग हा प्रशासनाचा कणा असून शासनाच्या महत्त्वाच्या योजना लोकांपर्यंत पोहोचविण्यात हा विभाग महत्त्वाची भूमिका बजावतो. जिल्ह्यात तहसील, उपविभागीय कार्यालये, तलाठी कार्यालये येथे महसूल कर्मचाऱ्यांना दैनंदिन कामकाज करणे सुकर व्हावे यासाठी आवश्यक त्या सुविधा उपलब्ध करून देऊ, असे आश्वासन राज्याचे पणन, अल्पसंख्याक विकास व औकाफ मंत्री तथा जिल्ह्याचे पालकमंत्री अब्दुल सत्तार यांनी दिले.

महसूल पंधरवाड्याचा समारोप जिल्हाधिकारी कार्यालयाच्या नियोजन सभागृहात करण्यात आला. सोहळ्यास विभागीय आयुक्त दिलीप गावडे, जिल्हाधिकारी दिलीप स्वामी, अप्पर जिल्हाधिकारी डॉ. अरविंद लोखंडे, उपायुक्त जगदीश मिणियार, मंदार वैद्य, गव्हाणे, श्रीमती बोंदरकर, उपजिल्हाधिकारी प्रभोदय मुळे, सर्व उपविभागीय अधिकारी, तहसीलदार, जिल्ह्यातील सर्व मंडळ अधिकारी, तलाठी व कर्मचारी तसेच कर्मचारी संघटनांचे पदाधिकारी उपस्थित होते. पालकमंत्री सत्तार म्हणाले, की महसूल कर्मचारी हे गाव ते जिल्हा विभाग पातळीपर्यंत काम करीत असतात. महसूल पंधरवाड्यात केलेल्या आरोग्य तपासणीत ज्या कर्मचाऱ्यांना पुढील उपचारांची गरज असेल त्यांच्यावर उपचार करण्यात येतील. कर्मचारी शारीरिक व मानसिकदृष्ट्या तंदुरुस्त असायला हवे, असेही त्यांनी सांगितले. प्रास्ताविक डॉ. अरविंद लोखंडे यांनी केले. विभागीय आयुक्त दिलीप गावडे, जिल्हाधिकारी दिलीप स्वामी यांनीही कर्मचाऱ्यांना संबोधित केले. श्रीमती प्रविणा कन्नडकर यांनी सूत्रसंचालन केले. कार्यक्रमात महसूल विभागाच्या अधिकारी, कर्मचाऱ्यांना पालकमंत्र्यांच्या हस्ते गौरविण्यात आले.